ព្យុងយ៉ាង៖យោងតាមសេចក្ដីរាយការណ៍ពីទីភ្នាក់ងារសារព័ត៌មានជប៉ុន Kyodo នៅព្រឹកថ្ងៃព្រហស្បតិ៍នេះបានឲ្យដឹងថា កូរ៉េខាងជើងនឹងរៀបចំបាញ់មីស៊ីលរយៈពេលវែងនៅក្នុងសប្ដាហ៍ខណៈដែល សមាជិកក្រុមប្រឹក្សាសន្តិសុខអង្គការសហប្រជាជាតិកំពុងពិភាក្សាអំពីការដាក់ទណ្ឌកម្មថ្មី។
ប្រភពដដែលបន្តថា ដោយយោងតាមការឲ្យដឹងពីមន្ត្រីរដ្ឋាភិបាលជប៉ុន បន្ទាប់ពីវិភាគលើ រូបភាពផ្កាយរណបចេញពីតំបន់ធ្វើតេស្ត មីស៊ីល Tongchang-ri របស់កូរ៉េខាងជើង នៅឆ្នេរសមុទ្រភាគខាងលិច បង្ហាញពីសញ្ញានៃការរៀបចំដាក់ដំណើរការមីស៊ីល។
កូរ៉េខាងជើង ត្រូវបានគេរកឃើញថា កំពុងធ្វើការលើក្បាលគ្រាប់នុយក្លេអ៊ែរ ដើម្បីបំពាក់លើមីស៊ីលផងដែរ ប៉ុន្តែក្រុមអ្នកជំនាញបានបង្ហាញថា បច្ចេកវិទ្យារបស់កូរ៉េខាងជើងនោះនៅមិនទាន់ទំនើបល្អប្រសើរនោះទេ។
គួរបញ្ជាក់ថា កូរ៉េខាងជើងបានធ្វើការសាកល្បងនុយក្លេអ៊ែរ៤លើកមកហើយ គឺលើកទី១នៅថ្ងៃទី០៩តុលា ឆ្នាំ២០០៦ លើកទី២នៅថ្ងៃទី២៥ ខែមេសា ឆ្នាំ២០០៩ លើកទី៣នៅថ្ងៃទី១២កុម្ភៈ ឆ្នាំ២០១៣ និងលើកទី៤នៅថ្ងៃទី០៦មករា ឆ្នាំ២០១៦កន្លងទៅកូរ៉េខាងជើងបានសាកល្បងដោយជោគជ័យលើគ្រាប់បែកអ៊ីដ្រូហ្សែន។ ការបាញ់សាកល្បងនេះធ្វើឲ្យប្រទេសសមាជិកក្រុមប្រឹក្សាសន្តិសុខអង្គការ សហប្រជាជាតិដាក់ចេញរបាយការណ៍ពីការពិភាក្សា អំពីការដាក់ទណ្ឌកម្មប្រឆាំងនឹងកម្មវិធី នុយក្លេអ៊ែរនិងមីស៊ីលរបស់កូរ៉េខាងជើងផងដែរ៕
