ខ្មាន់កាំភ្លើង AK ឡើងបាញ់បុរសម្នាក់ដល់លើផ្ទះរួចរត់ចុះគេចខ្លួនបាត់
ខេត្តកំពត៖ បុរសម្នាក់ ត្រូវបានជនមិនស្គាល់មុខប្រើកាំភ្លើង AK ចូលបាញ់រះដល់ក្នុងផ្ទះបណ្តាលឲ្យដាច់ម្រាមដៃ និងត្រូវក្បាលរងរបួសធ្ងន់នៅម៉ោង ៨៖៤០នាទីយប់ថ្ងៃទី២៧ ខែមករា ឆ្នាំ២០១៦ ស្ថិតក្នុងភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
នគរបាលស្រុកឈូកបានប្រាប់នៅព្រឹកថ្ងៃទី២៨ ខែមករា នេះថា ជនរងគ្រោះមានឈ្មោះ ផាត់ តាប់ អាយុ ៣៦ឆ្នាំ រស់នៅក្នុងភូមិឃុំកើតហេតុខាងលើ។ នគរបាលដដែលបន្តថា ក្រោយពីបាញ់លើជនរងគ្រោះហើយ ជនសង្ស័យបានរត់ចុះពីលើផ្ទះគេចខ្លួនបាត់ដោយពុំបានយកទ្រព្យសម្បត្តិអ្វីឡើយ។
ចំណែកជនរងគ្រោះត្រូវគេដឹកយកទៅព្យាបាលនៅមន្ទីរពេទ្យបង្អែក ខេត្តកំពត។បច្ចុប្បន្នកម្លាំងសមត្ថកិច្ចកំពុងស្រាវជ្រាវវែកមុខសញ្ញាយកមកផ្តន្ទាទោស និងចាត់ការតាមច្បាប់៕
