ភ្នំពេញ៖ ជនសង្ស័យម្នាក់ដែលទើបប្រឡងជាប់ជាមន្ត្រីនគរបាលត្រូវសមត្ថកិច្ចចម្រុះឃាត់ខ្លួន កាលពីព្រឹកថ្ងៃទី១៤ ខែតុលា ឆ្នាំ២០១៤នេះ នៅជិតរង្វង់មូលផ្សារដើមថ្កូវ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញពាក់ព័ន្ឋនឹងករណីសម្លាប់នារីម្នាក់ជានិស្សិតឆ្នាំទី១នៃវិទ្យាស្ថានវ៉ាន់ដាគណនេយ្យ ។
តាមរបាយការណ៍បញ្ជាក់ថា ជនសង្ស័យ ឈ្មោះ ហុង កាលីឌីន អាយុ២៧ឆ្នាំ ទើបប្រឡងជាប់ជាមន្ត្រីនគរបាល និងត្រូវជាសង្សាររបស់នារីរងគ្រោះឈ្មោះសុង ដាវីន អាយុ២០ឆ្នាំ ជានិស្សិតនៅវិទ្យាស្ថានវ៉ាន់ដាគណនេយ្យ។
ប្រភពបង្ហាញថា ក្នុងការឃាត់ខ្លួនជននេះគេបានដកហូតយករថយន្តមួយគ្រឿងម៉ាកធុនត្រា ស៊េរី២០១៤ និងកាំភ្លើង២ដើម ។បន្ទាប់មកបាននាំជនសង្ស័យទៅឆែកឆេរក្នុងលំនៅដ្ឋានរបស់ជននោះលេខ១០៤ ផ្លូវ៤៣០ ក្នុងសង្កាត់ផ្សារដើមថ្កូវ ខណ្ឌចំការមន ដើម្បីរកវត្ថុតាងពាក់ព័ន្ធនឹងការជួញដូរគ្រឿងញៀន និងករណីរំលោភធ្វើទារុណកម្មសម្លាប់នារីរងគ្រោះ។
បច្ចុប្បន្នសមត្ថកិច្ចកំពុងសាកសួរជនសង្ស័យពីមូលហេតុដែលនាំអោយមានការសំលាប់នារីរងគ្រោះ រួចយកទៅបោះចោលនៅទឹកទន្លេ។
គួររំលឹកថា កាលពីម៉ោងប្រមាណ៦ព្រឹក ថ្ងៃទី០៧ ខែតុលា នៅពេលដែលប្រជាពលរដ្ឋធ្វើដំណើរទៅហាត់ប្រាណគេបានប្រទះឃើញសពនារីរងគ្រោះអណ្តែត ទឹកនៅខាងមុខសាលាបឋមសិក្សាជ្រោយចង្វា។កាលណោះសមត្ថកិច្ចបានសន្និដ្ឋានជំហានដំបូងថាស្ត្រីវ័យក្មេងរូបនេះត្រូវបានឃាតករមិនស្គាល់មុខរំលោភរួចធ្វើទារុណកម្មជាំពេញ ខ្លួនប្រាណរហូតដល់ស្លាប់ ហើយដឹកសពយកទៅទម្លាក់ចោលនៅក្នុងទឹកទន្លេ មុខសាលាបឋមសិក្សាជ្រោយចង្វា ខាងត្បូងស្ពានជ្រោយចង្វាប្រហែលកន្លះគីទ្បូម៉ែត្រ ស្ថិតក្នុងភូមិទី២ សង្កាត់ជ្រោយចង្វា ខណ្ឌជ្រោយចង្វា។
ក្រោយពេលធ្វើកោសល្យសមត្ថកិច្ចសន្នដ្ឋានថា មិនមែនជាការធ្វើអត្តឃាតនោះទេ ព្រោះបើលង់ទឹក ច្បាស់ជាផឹកទឹកពេញពោះជាមិនខាន តែសពបែរគ្មានសញ្ញាបែបនេះ ហើយលើសាកសពមានស្នាមជាំពេញដងខ្លួន ហើយប្រដាប់ភេទមានទឹកកាមផងដែរ គឺពិតជាត្រូវគេរំលោភសម្លាប់រួចយកមកទម្លាក់ទឹក។
ជនសង្ស័យត្រូវបានសមត្ថកិច្ចនាំខ្លួនទៅសាកសួរចម្លើយមុនពេលបញ្ជូនទៅតុលាការដើម្បីវិនិច្ឆ័យទោស៕ សមិទ្ធ វង្ស
ទិដ្ឋភាពឡោមព័ទ្ធចាប់ជនសង្ស័យ
