ភ្នំពេញ៖ កូនស្រីច្បងរបស់លោកកឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១រដ្ឋសភា កញ្ញា កឹម មនោវិទ្យា តួនាទីជាអនុ ប្រធានផ្នែកកិច្ចការសាធារណៈរបស់គណបក្សសង្គ្រោះជាតិបានប្រកាសដកខ្លួនចេញពីបេក្ខជន គ.ជ.បថ្មី។
ក្នុងហ្វេសប៊ុករបស់ខ្លួន នៅព្រឹកថ្ងៃទី១៤តុលានេះ កញ្ញា កឹម មនោវិទ្យា កូនស្រីច្បងអាយុ ៣៣ ឆ្នាំរបស់លោកកឹម សុខា បានសរសេរជាភាសាអង់គ្លេសយ៉ាងខ្លីថា កញ្ញានាងនឹងមិនចូលរួមក្នុង គ.ជ.ប ដែលទើបបង្កើតថ្មីនោះទេ។ កញ្ញាបានសរសេរថា ការជ្រើសរើសសមាជិកគណៈកម្មាធិការរៀបចំការបោះឆ្នោតនៅក្នុងប្រទេសប្រជាធិបតេយ្យជាច្រើន គឺមានដំណើរការមិនបើកចំហនោះទេ អ្វីៗត្រូវធ្វើឡើងដោយការតែងតាំង។
កាលពីថ្ងៃទី២២ ខែកក្កដា ឆ្នាំ២០១៤ បន្ទាប់ពីកិច្ចព្រមព្រៀងនយោបាយរវាងមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិបានបញ្ចប់ សមាសភាពគ.ជ.បថ្មី ត្រូវបានប្រកាសព័ត៌មាន ដែលគេដឹងថា ក្នុងនោះសមាសភាព ៤ រូប របស់គណបក្សសង្គ្រោះជាតិត្រូវបានគណបក្សប្រកាសជាផ្លូវការ គឺលោក គួយ ប៊ុនរឿន ចំណែក៣ រូបទៀតស្ថិតក្នុងលក្ខណៈមិនផ្លូវការ គឺកញ្ញា កឹម មនោវិទ្យា លោកគល់ បញ្ញា និងលោក យ៉េង វីរៈ។ ដោយឡែកលោកស្រី ពុង ឈីវកេក ប្រធានអង្គការលីកាដូ ក៏មានតួនាទីដ៏ចម្បងនៅក្នុងគ ជ ប ថ្មីនេះដែរ ។ ចំពោះគណបក្សប្រជាជនកម្ពុជា បេក្ខជន ៤ រូប ជាសមាជិកគជបថ្មី មិនត្រូវបានគេទម្លាយឲ្យដឹងនៅឡើយទេ។
ឆ្លើយតបនឹងព័ត៌មាននេះ ទាំងគណបក្សសង្គ្រោះជាតិ ក៏ដូចជា គ ជ ប ថ្មីនៅមិនទាន់មាន ប្រតិកម្មបែបណានៅឡើយទេ៕ ជំនិត
