សៀមរាបៈមន្ដ្រីនៃអាជ្ញាធរអប្សរាបានអះអាង ថា ព្រះពុទ្ធបដិមាដែលស្ត្រីទេសចរនូវែលសេឡង់ម្នាក់ធ្វើឲ្យបាក់នៅកំពូលកណ្ដាលក្នុងប្រាសាទបាយ័ននៃតំបន់ប្រាសាទអង្គរធំកាល ពីយប់ថ្ងៃ ទី៩ ខែតុលា នោះឥឡូវនេះត្រូវក្រុមអ្នកជំនាញរបស់អាជ្ញាធរអប្សរា បានជួសជុលរួចហើយ។
មន្ដ្រីនៃអាជ្ញាធរអប្សរាដែលសុំមិនឲ្យបញ្ចេញឈ្មោះម្នាក់បាន ឲ្យដឹងថា ពុទ្ធបដិមាដែលបានជួសជុលរួចរាល់នោះ មិនត្រូវបានដាក់តម្កល់នៅកន្លែងដើមនៅឡើយ គឺត្រូវបានរក្សាទុកជាបណ្ដោះអាសន្ន នៅក្នុងសារមន្ទីរព្រះនរោត្តម សីហនុ-អង្គរ ក្នុង ក្រុងសៀមរាប។
ស្ត្រីទេសចរឈ្មោះ Willemejn Vermaat ពេលបានទៅដល់ ប្រទេសនូវែលសេឡង់ វិញបានសារភាពប្រាប់បណ្តាញព័ត៌មាន នូវែលសេឡង់ ថា នាងបានធ្វើឲ្យបាក់បែកពុទ្ធបដិមា នៅប្រាសាទបាយ័ន ក្នុង ខេត្តសៀមរាប នៃប្រទេសកម្ពុជា។
ប្រព័ន្ធផ្សព្វផ្សាយ នូវែលសេឡង់ Stuff.co.nz បានរាយការណ៍ថា នាង Vermaat មានវិញ្ញាណអាថ៌កំបាំងបានមកប្រាប់គាត់ឲ្យយកបដិមាព្រះពុទ្ធ ចេញពីប្រាសាទនេះ ពីព្រោះថា វាមិនមែនជាប្រាសាទរបស់ព្រះពុទ្ធទេ។
អ្នកនាង Vermaat ត្រូវបានស្រង់សម្តីមកថា៖ «នៅពេលខ្ញុំទៅដល់ទីនោះ ខ្ញុំមានអារម្មណ៍ចម្លែក ហាក់មានអ្វីកំពុងជំរុញខ្ញុំឲ្យទៅកាន់ទីនោះ ហើយត្រូវបានប្រាប់ថា ខ្ញុំត្រូវតែយកពុទ្ធបដិមានេះចេញ ប៉ុន្តែខ្ញុំតបថា ខ្ញុំមិនចង់ទេ ព្រោះវាជាសាសនាដ៏អស្ចារ្យ ដែលទាំងនេះគឺមិនមែនជាការលេងសើចទេ។ បន្ទាប់មកខ្ញុំក៏រុញវាឲ្យបាក់បែក តែតមកខ្ញុំបានសុំទោស»។
សមត្ថកិច្ចនគរបាលកម្ពុជា ពីថ្ងៃសុក្រមុន បានតាមរកអ្នកនាង Vermaat ដែលបាត់ខ្លួននៅក្នុងយប់នោះ ប៉ុន្តែនគរបាលក៏បានឃើញការបាក់បែកពុទ្ធបដិមានោះភ្លាមៗដែរ បន្ទាប់ពីអ្នកនាង Vermaat ចាកចេញពីសៀមរាប។
នៅមិនទាន់ច្បាស់នៅឡើយទេ ថាតើអ្នកនាង Vermaat នឹងត្រូវនាំយកទៅកាត់ទោសចំពោះករណីនេះឬយ៉ាងណា?
ប៉ុន្តែតាមសេចក្តីរាយការណ៍ពីសារព័ត៌មាន នូវែលសេឡង់ អ្នកនាង Vermaat ក៏បាននិយាយសុំទោស ចំពោះអង្គការ យូណេស្កូ (UNESCO) ផងដែរ ចំពោះការដែលខ្លួនគាត់ធ្វើឲ្យខូចពុទ្ធបដិមានៅកម្ពុជានេះ។
លោក អ៊ឹម សុខរិទ្ធី អ្នកនាំពាក្យអាជ្ញាធរអប្សរា បានថ្លែងថា៖ «ជនដែលធ្វើឲ្យបាក់បែកឬបំផ្លាញបដិមាជាបេតិកភណ្ឌរបស់យើងត្រូវតែ ឲ្យទទួលខុសត្រូវទៅតាមច្បាប់»។
តាមសេចក្ដីប្រកាសព័ត៌មានចុះថ្ងៃ ទី១២ តុលា ស្ដីពីការបាក់បែកពុទ្ធបដិមានៅប្រាសាទបាយ័ន នេះអាជ្ញាធរអប្សរាបានបញ្ជាក់ថា នៅថ្ងៃ ទី៩ ខែតុលា ឆ្នាំ២០១៤ នៅម៉ោងប្រហែល ៦ ល្ងាចអ្នកបើករ៉ឺម៉កម៉ូតូម្នាក់រាយការណ៍មកនគរបាលការពារបេតិកភណ្ឌ នៅ វត្តព្រះអង្គ គោកធ្លក ក្បែរប្រាសាទបាយ័នថា ស្ត្រីជាភ្ញៀវទេសចរជិះរ៉ឺម៉កគាត់ម្នាក់អាយុប្រហែល ៤០ឆ្នាំ ជនជាតិនូវែលសេឡង់ បានបាត់ខ្លួនមិនឃើញមកទីលានជល់ដំរី តាមណាត់ទេ។
លុះទៀបភ្លឺទើបកម្មករជួសជុលប្រាសាទប្រទះឃើញភ្ញៀវស្រី នោះនៅប៉ែកអាគ្នេយ៍ប្រាសាទបាយ័ន ហើយត្រូវនគរបាលការពារបេតិកភណ្ឌអញ្ជើញមកសាកសួរព័ត៌មាន។
ក្នុងសេចក្ដីប្រកាសព័ត៌មានបញ្ជាក់ដែរថា បដិមាដែលបាក់បែកនោះ ជាពុទ្ធបដិមា ទ្រង់យកព្រះធរណីធ្វើជាសាក្សី មិនមែនពុទ្ធបដិមាប្រក់នាគទេ។ ហើយព្រះបដិមានេះក៏មិនមែនជារូបដើមនៅទីនេះតាំងពីចុងសតវត្សរ៍ ទី១២ ក្នុងរាជ្យព្រះបាទជ័យ វរ័ន្ម ទី៧ ដែរ។
រូបព្រះបដិមានេះ ត្រូវក្រុមអភិរក្សដ្ឋានអង្គរយកមកផ្គុំឡើង ដើម្បីធ្វើការគោរពបូជាក្នុង ឆ្នាំ១៩៨៨៕ ប្រភព៖ខ្មែរប៉ុស្តិ៍
ក្រុមជំនាញនៃអាជ្ញាធរអប្សរាកំពុងជួសជុលពុទ្ធបដិមាដែលភ្ញៀវធ្វើឲ្យបាក់បែក។ រូបថត សហការី
