អូស្ត្រាលី៖ចំនួនពលរដ្ឋអូស្ដ្រាលីដែលកំពុងប្រើប្រាស់គ្រឿងញៀនមេតាំហ្វេតាមីនខុសច្បាប់បានកើនឡើង៣ដងក្នុងអំឡុងពេល៥ឆ្នាំកន្លងមកនេះ។ នេះបើយោងតាមការប៉ាន់ប្រមាណរបស់មជ្ឈមណ្ឌលជាតិអូស្ដ្រាលីស្រាវជ្រាវជាតិសុរា និងគ្រឿងញៀន។
ការសិក្សានេះដែលត្រូវគេបោះពុម្ពផ្សាយក្នុងទស្សនាវដ្ដីវេជ្ជសាស្ដ្រ (Medical Journal) នៅក្នុងប្រទេសអូស្ដ្រាលីបង្ហាញថា មានអ្នកប្រើប្រាស់ថ្នាំញៀននេះទៀងទាត់ប្រមាណ២សែន៦ម៉ឺន៨ពាន់នាក់។ លោកស្រីបណ្ឌិត Sarah Larney និយាយថា កាលពីពេល៥ឆ្នាំមុនចំនួនអ្នកប្រើគ្រឿងញៀនទឹកកកនេះគឺមានប្រហែលជា៩ម៉ឺននាក់ប៉ុណ្ណោះ។
លោកស្រី Sarah Larney និយាយទៀតថា លទ្ធផលនៃការស្រាវជ្រាវដែលបានធ្វើឲ្យគេមានការភ្ញាក់ផ្អើលនោះគឺយុវជនអ្នកប្រើក្នុងចន្លោះអាយុពី១៥ទៅ២៤ឆ្នាំបានកើនឡើងជាងទ្វេដងពីអ្នកប្រើគ្រឿងញៀនប្រចាំប្រហែល២ម៉ឺន១ពាន់នាក់កាលពី៥ឆ្នាំមុនមក៥ម៉ឺន៩ពាន់នាក់នៅពេលឥឡូវនេះ។
គួរបញ្ជាក់ថា កាលពីពាក់កណ្ដាលខែកុម្ភៈឆ្នាំ២០១៦នេះប៉ូលិសសហព័ន្ធអូស្ដ្រាលីរឹបអូសបានគ្រឿងញៀនទឹកកកដែលគេលួចនាំចូលយ៉ាងច្រើនបំផុតក្នុងប្រវត្ដិសាស្ដ្រប្រទេសអូស្ដ្រាលីក្នុងតម្លៃជាង១ពាន់២រយលានដុល្លារអូស្ដ្រាលី៕
