ដោយ៖ រតនា
ភ្នំពេញ៖បវកញ្ញាមកពីសហរដ្ឋអាមេរិកចំនួន៤នាក់នឹងធ្វើដំណើរមកកាន់ប្រទេសកម្ពុជាដើម្បីទស្សនាប្រទេសកម្ពុជា ចូលគាល់ព្រះមហាក្សត្រ និងមានបំណងសហការជាមួយនឹងសមាគមសិលក្បករខ្មែរដើម្បីរៀបចំកម្មវិធីប្រគុំតន្ត្រីសប្បុរសធម៌មួយរកមូលនិធិ ជួយដល់មន្ទីរពេទ្យគន្ធបុប្ផា និងមួយចំណែកទៀតសម្រាប់តម្កល់ជួយដល់សិល្បករក្រីក្រ។
ការបញ្ជាក់ក្នុងគ្រាដែលសមាគមសិល្បករខ្មែររៀបចំការប្រជុំមួយ កាលពីល្ងាចថ្ងៃទី២៩ខែកុម្ភៈនេះ នៅឯមណ្ឌលកម្សាន្ត XOក្រោមវត្តមានសមាជិកក្រុមប្រឹក្សាភិបាលសមាគម និងសិល្បករក្មេងចាស់ប្រុសស្រីជាច្រើនចូលរួម។
ថ្លែងក្នុងឱកាសនេះលោក អៀង ស៊ីធុល ប្រធានកិត្តិយសសមាគមសិល្បករខ្មែរបានថ្លែងថា គណៈកម្មការមហោស្រព និងជ្រើសរើសបវរកញ្ញាសហរដ្ឋអាមេរិក គ្រោងនាំជយលាភីបវរកញ្ញាចំនួន៤នាក់ ជាជនជាតិអាមេរិក ខ្មែរ អូស្ត្រាលី និង ហ្វីលីពីន ដើម្បីមកទស្សនកិច្ចនៅប្រទេសកម្ពុជានៅអំឡុងដើមខែ ឧសភាខាងមុខ។លោកបានបន្ថែមថា ក្នុងដំណើរទស្សនកិច្ច ក្រុមបវរកញ្ញារួមជាមួយក្រុមការងារ មានបំណង៣ធំៗ ក្នុងនោះ ទី១ចូលគាស់ព្រះមហាក្សត្រ, ទី២ ទស្សនាប្រាសាទអង្គរវត្ត, និងទី៣ ចង់ឲ្យសមាគមសិល្បករខ្មែរបង្កើតកម្មវិធីប្រគំតន្ត្រី១ ដើម្បីជួយរកមូលនិធិជួយដល់កុមារក្រីក្រនៅកម្ពុជា។ ទោះជាយ៉ាងណាភាគីគណះកម្មការនៅសហរដ្ឋអាមេរិកនោះបានតម្រូវឲ្យខាងភាគីខ្មែរទទួលខុសត្រូវសម្រាប់កន្លែងស្នាក់នៅ អាហារ និង ការធ្វើដំណើរក្នុងស្រុក។ ចំណែក សំបុត្រយន្តហោះទៅមក ភាគីអាមេរិកជាអ្នករ៉ាប់រង។ទោះបីជាយ៉ាងណា សិល្បករជើងចាស់ខាងលើនៅមិនទាន់ឆ្លើយតបយ៉ាងណាទេ ដោយលោកកំពុងត្រូវការក្រុមហ៊ុនក្នុងស្រុកមួយជួយលើកិច្ចការទាំងនេះ។
លោក អៀង ស៊ីធុល រំពឹងថា ប្រសិនបើការប្រគំតន្ត្រីសប្បុរសធម៌ខាងលើកើតឡើងដូចការគ្រោងទុក ហើយមានក្រុមហ៊ុនច្រើនចូលរួមឧបត្ថម្ភមែននេះ ច្បាស់ជាទទួលបានថវិកាច្រើនជួយដល់មន្ទីរពេទ្យគន្ធបុប្ផា ក៏ដូចជាតម្កល់ទុកមួយចំណែក ជួយដល់សិល្បករបាត់បង់សមត្ថភាព និងមានបញ្ហាផ្នែកជីវភាពរស់នៅប្រចាំថ្ងៃ។
ទោះជាយ៉ាងណាក្តីលោក សុះ ម៉ាច ប្រធានសមាគមសិល្បករខ្មែរបញ្ជាក់ថា សមាគមនៅមិនទាន់កំណត់ថ្ងៃ សមាសភាពចូលរួម និងទីតាំងប្រារព្វពិតប្រាកដរបស់សិល្បករខ្មែរល្បីៗរូបណានឹងចូលរួមនៅឡើយទេខណៈដែលពេលនេះសមាគមកំពុងទំនាក់ទំនងទៅកាន់ក្រុមការងារផលិតកម្មវិធីដែលមានជំនាញនិងបទពិសោធន៍ខ្ពស់ដើម្បីប្រាកដថា ការរៀបចំកម្មវិធីប្រគុំតន្ត្រីខាងលើនេះប្លែកមិនធ្លាប់មាននឹងមានចំណុចពិសេសអាចទាក់ទាញការចាប់អារម្មណ៍ច្រើនពីមហាជនទាំងក្នុងនិងក្រៅស្រុក។
លោកបន្តថា ការពិភាក្សា និងរៀបចំសំណុំឯកសារទៅកាន់ស្ថាប័នពាក់ព័ន្ធកំពុងរៀបចំជាបណ្តើរដែលលោករំពឹងថាការប្រគុំតន្ត្រីនេះនឹងលេចចេញជារូបរាងតាមកការគ្រោងទុកនោះហើយប្រសិនបើដូចតាមការគ្រោងទុកមែនសមាគមអាចមានលទ្ធភាពស្វែងរកថវិកាតម្កល់ទុក្ខនៅសមាគមដើម្បីជួយសម្រួលដល់សិល្បករចាស់ៗដែលបាត់បង់លទ្ធភាព ចាស់ជរា ឬមានជំងឺជាដើម៕
