ដោយ៖អ វឹង
ខេត្តកំពត៖ លោក ខូយ ឃុនហ៊ួរ អភិបាលខេត្ក កាលពីរសៀលថ្ងៃទី០៧ ខែមីនា ឆ្នាំ២០១៦បាន អញ្ជើញចូលរួមសំណេះសំណាលជាមួយមន្ត្រីរាជការសាលាខេត្តកំពតក្នុងឱកាសនៃការប្រារព្ធពិធីអបអរខួបលើកទី១០៥ នៃទិវានារីអន្តរជាតិ ៨មីនា ឆ្នាំ២០១៦ ក្រោមប្រធានបទៈ”វិនិយោគលើសមភាពយេនឌ័រ ដើម្បីកិច្ចអភិវឌ្ឍប្រកបដោយចីរភាព”។
មានប្រសាសន៍សំណេះសំណាលបន្ទាប់ពីលោក ស្រី យូ សុគន្ធ អភិបាលរងខេត្ត បានអាននូវព្រះរាជសារសម្តេចព្រះមហាក្សត្រីនរោត្តម មុនីនាថសីហនុ ព្រះវររាជមាតាជាតិខ្មែរក្នុងសេរីភាពសេចក្តីថ្លៃថ្នូរដ៏ខ្ពង់ខ្ពស់បំផុតឱកាសអបអរសាទរខួបលើកទី១០៥នៃទិវានារីអន្តរជាតិ៨មីនាឆ្នាំ២០១៦ និង លោកស្រី មុយ វិរត្ន នាយករងរដ្ឋបាលសាលាខេត្ត បានធ្វើរបាយការណ៍ឲ្យដឹងអំពី ស្ថានភាពការងារមន្ត្រីរាជការ ពិសេសស្ថានភាពការងារស្ត្រីមានលក្ខណៈសមភាពយេនឌ័រល្អប្រសើរ ទាំងតួនាទីភារកិច្ចការងារប្រកបដោយស្មារតីភ្ញាក់រលឹកនិងម្ចាស់ការខ្ពស់នៅក្នុងអង្គភាពចំណុះសាលាខេត្តកំពតរួចមក លោក ខូយ ឃុនហ៊ួរ បានសំដែងការអបអរសាទរចំពោះទិវាសិទ្ធនារីអន្តរជាតិ៨មីនាខួបលើកទី១០៥ឆ្នាំ២០១៦នេះដោយបានចាត់ទុកទិវាដ៏មានសារៈសំខាន់នេះ គឺក្នុងគោលបំណងជំរុញឲ្យមានកិច្ចខិតខំប្រឹងប្រែង ដើម្បីបង្កើនការវិនិយោគ ទាំងធនធានមនុស្ស និងសេដ្ឋកិច្ចសម្រាប់ការលើកកម្ពស់សមភាពយេនឌ័រនិងពង្រឹងភាពអង់អាចរបស់ស្ត្រីនៅទូទាំងប្រទេសនិងនិយាយដោយឡែកនៅក្នុងខេត្តកំពត។
លោកអភិបាលខេត្តបានចាត់ទុកសមភាពយេនឌ័រ គឺជាកំលាំងស្នូលនៃកិច្ចអភិវឌ្ឍន៍ប្រកបដោយចីរភាព ដើម្បីលើកកម្ពស់សុខុមាលភាពវិបុលភាព និងភាពសុខដុមរមនានៃសង្គម ហើយពិសេសផ្តល់នូវឧត្តមប្រយោជន៍ជាច្រើន មិនត្រឹមតែសម្រាប់ស្ត្រីប៉ុណ្ណោះទេប៉ុន្តែក៏សម្រាប់បុរស សហគមន៍ និងសង្គមជាតិទាំងមូលផងដែរ។
ក្នុងឱកាសនោះ លោក ខូយ ឃុនហ៊ួរ ក៏បានអំពាវនាវដល់មន្ត្រីរាជការទាំងអស់ត្រូវខិតខំជំរុញលើកកម្ពស់ស្ថានភាពយេនឌ័រមិនថានៅក្នុងអង្គភាពកន្លែងបំរើការងារសូម្បីនៅក្នុងសង្គមគ្រួសារក៏ត្រូវមានការយកចិត្តទុកដាក់បញ្ហាសមភាពយេនឌ័រនេះជាសំខាន់ដែរ។
លោកអភិបាលខេត្តក៏បានផ្តាំផ្ញើដល់មន្ត្រីរាជការទាំងអស់ក៏ត្រូវខិតខំពង្រឹងអភិវឌ្ឍន៍សមត្ថភាពពិសេសស្ត្រីខ្លួនឯងត្រូវមានការយកចិត្តទុកដាក់បង្កើននូវចំណេះដឹងឲ្យបានទូលំទូលាយដើម្បីក្លាយខ្លួនជាអ្នកគ្រប់គ្រងដឹកនាំដ៏ល្អពូកែទាំងនៅក្នុងស្ថាប័ននិងអង្គ ភាពក៏ដូចនៅក្នុងសង្គមគ្រួសារផងដែរ។
ក្នុងឱកាសនោះដើម្បីចូលរួមជំរុញលើកកម្ពស់អនុវត្តច្បាប់ចរាចរណ៍ផ្លូវគោកឲ្យបានកាន់មានប្រសិទ្ធភាពលោក ខូយ ឃុនហ៊ួរ ក៏បានជូននូវវត្ថុអនុស្សាវរីយ៍ មួកការពារសុវត្ថិភាពម្នាក់០១ អមដោយថវិកាចំនួន៤ម៉ឺនរៀលដល់បងប្អូនមន្ត្រីរាជការជាស្ត្រីចំនួន៧២នាក់ដែលបានចូលរួមក្នុងឱកាសដ៏អធិកអធមនេះ៕
