ភ្នំពេញ៖ បន្ទាប់ពីបានបោះឆ្នោតជ្រើសតាំងប្រធាននិងអនុប្រធានគណៈកម្មការទី១,ទី២ និងទី៣ នោះរួចមក សម្តេច ហេង សំរិន ប្រធានរដ្ឋសភា បានប្រកាសផ្អាកសម័យប្រជុំពេញអង្គរដ្ឋសភានៅម៉ោង១១និង៤០នាទីថ្ងៃត្រង់ ថ្ងៃទី២៦ ខែសីហា ឆ្នាំ២០១៤។ហើយកិច្ចប្រជុំរដ្ឋសភា នឹងបន្តនៅព្រឹកថ្ងៃពុធ ទី២៧សីហា ដើម្បីបោះឆ្នោតជ្រើសតាំងជំនួស និងបំពេញបន្ថែមសមាជិកគណៈកម្មការ ៧ ផ្សេងទៀត។
កិច្ចប្រជុំរដ្ឋសភាមួយព្រឹកនេះ បានបោះឆ្នោតជ្រើសតាំងលោក ងួន ញ៉ិល ជាអនុប្រធានទី២រដ្ឋសភា និងលោក កឹម សុខា អនុប្រធានគណបក្សសង្គ្រោះជាតិ ជាអនុប្រធានទី១រដ្ឋសភា នឹងបោះឆ្នោតជ្រើសតាំងជំនួស និងបំពេញបន្ថែមសមាជិកគណៈកម្មការចំនួន ៣ ប៉ុណ្ណោះ។
មុនពេលប្រកាសផ្អាកកិច្ចប្រជុំរដ្ឋសភា នាព្រឹកថ្ងៃអង្គារនេះ សម្តេច ហេង សំរិន ប្រធានរដ្ឋសភា បានតម្រូវឲ្យសមាជិកគណៈកម្មការ ចំនួន ៣ ដែលបានជាប់ឆ្នោតហើយ គឺសមាជិកគណៈកម្មការទាំង ៩ រូប ក្នុងគណៈកម្មការនិមួយៗ ត្រូវជួបប្រជុំ ហើយបោះឆ្នោតផ្ទៃក្នុង នារសៀលថ្ងៃអង្គារនេះ ដើម្បីជ្រើសរើសប្រធាន អនុប្រធាន និងលេខាធិការនៃគណៈកម្មការទាំង ៣ នោះ។
គួរបញ្ជាក់ថា ប្រធាននិងអនុប្រធានគណៈកម្មការទាំង៣ខាងលើ ដែលរដ្ឋសភាបោះឆ្នោតជ្រើសតាំងនៅប៉ុន្មាននាទីមុននេះរួមមាន៖
– លោក អេង ឆៃអ៊ាង ប្រធានគណៈកម្មការសិទ្ឋិមនុស្ស ទទួលពាក្យបណ្តឹង អង្កេតនិងទំនាក់ទំនងព្រឹទ្ឋសភា រដ្ឋសភា (គណៈកម្មការទី១) មកពីខាងគណបក្សសង្គ្រោះជាតិ។
– លោក ជៀម យាប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារនិងសវនកម្ម (គណៈ កម្មការទី២ រក្សាដដែល ) មកពីគណបក្សប្រជាជនកម្ពុជា ។ អនុប្រធានគណៈកម្មការនេះ គឺ លោក សុន ឆ័យ មកពីគណបក្សសង្គ្រោះជាតិ។
– លោក ប៉ុល ហំម ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាននិងធនធានទឹក ( គណៈ កម្មការទី៣ ) មកពីគណបក្សសង្គ្រោះជាតិ។
សូមរម្លឹកថា អ្នកតំណាងរាស្ត្រ ចំនួន ១២២ រូប បានចូលរួមកិច្ចប្រជុំរដ្ឋសភាជាវិសាមញ្ញ នាព្រឹកថ្ងៃទី២៦សីហានេះ ដើម្បីបោះឆ្នោតជ្រើសតាំងថ្នាក់ដឹកនាំក្បាលម៉ាស៊ីនថ្មី របស់រដ្ឋសភា។ នោះគឺការបោះឆ្នោតជ្រើសតាំងអ្នកតំណាងរាស្ត្រ ៤៦ រូប មកពីគណបក្សសង្គ្រោះជាតិ ជាអនុប្រធានទី១រដ្ឋសភា និងជាប្រធាន អនុប្រធាន លេខាធិការ និងសមាជិកគណៈកម្មការជំនាញទាំង ១០ របស់រដ្ឋសភា។
បន្ទាប់ពីការបោះឆ្នោតជ្រើសតាំងលោក ងួន ញ៉ិល ជាអនុប្រធានទី២ រដ្ឋសភា និងលោក កឹមសុខា ជាអនុប្រធានទី១រដ្ឋសភា រួចមក កិច្ចប្រជុំរដ្ឋសភា បានបន្តដំណើរការបោះឆ្នោតជ្រើសតាំងជំនួស និងបំពេញបន្ថែមសមាជិកគណៈកម្មការនានារបស់រដ្ឋសភា។ នោះគឺអ្នកតំណាងរាស្ត្រគណបក្សសង្គ្រោះជាតិ ៤៥ រូប ត្រូវបានរដ្ឋសភាបោះឆ្នោតជ្រើសតាំងជាសមាជិកគណៈកម្មការទាំង១០។ នីតិវិធីនៃការបោះឆ្នោតនោះ បានធ្វើឡើង ១ គណៈកម្មការម្តង។ ៥ គណៈកម្មការ ដែលមានគណបក្សសង្គ្រោះជាតិ ជាប្រធាន គឺគណបក្សសង្គ្រោះជាតិ មានតំណាងរាស្ត្រ ៥ រូប។ រីឯគណៈកម្មការ ៥ ទៀត ដែលមានគណបក្សប្រជាជនកម្ពុជា ជាប្រធាន គឺអ្នកតំណាងរាស្ត្រគណបក្សសង្គ្រោះជាតិ ៤ រូប ត្រូវបានគេបោះឆ្នោតជ្រើសតាំងជាសមាជិកគណៈកម្មការ។
សូមបញ្ជាក់ថា ការបោះឆ្នោតរុះរើក្បាលម៉ាស៊ីនរដ្ឋសភាថ្មីនាព្រឹកនេះ បានធ្វើឡើង អនុលោមតាមកិច្ចព្រមព្រៀងបិទបញ្ចប់ វិបត្តិ នយោបាយរបស់គណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២ ខែកក្កដា ឆ្នាំ២០១៤ នាវិមានព្រឹទ្ធសភា៕
