រាជធានីភ្នំពេញ៖ករណីរឿងអាស្រូវផ្លូវភេទ ទាក់ទង លោក កឹម សុខា តំណាងរាស្ត្រ និងជាប្រធានស្តីទីគណបក្សសង្គ្រោះជាតិត្រូវបានរដ្ឋសភាសម្រេចឲ្យលោក កឹម សុខា ឆ្លើយបំភ្លឺចំពោះរដ្ឋសភា។
លិខិតរបស់លោកឡេង ប៉េងឡុង ចុះថ្ងៃទី២១មីនា បានសរសេរថា «យោងតាមលិខិតលេខ០០៨ ចុះថ្ងៃទី១៥មីនាឆ្នាំ២០១៦របស់គណៈកម្មការសិទ្ធិមនុស្សទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភានៃរដ្ឋសភា ដើម្បីការពារកិត្យានុភាពរបស់រដ្ឋសភា ការពារកិត្តិយសជាតិនិងសេចក្តីថ្លៃថ្នូររបស់តំណាងរាស្ត្រ ឯកឧត្តម ងួន ញ៉ិល ប្រធានរដ្ឋសភាស្តីទី បានប្រគល់ភារកិច្ចឲ្យអគ្គលេខាធិការដ្ឋានរដ្ឋសភា បញ្ជូនញត្តិនេះទៅឯកឧត្តម កឹម សុខា»។
លិខិតពីរដ្ឋសភាបានបញ្ជាក់ថា រដ្ឋសភាបានទទួលញត្តិស្នើសុំពីតំណាងយុវជននិងនិស្សិត គឺលោក ស្រី ចំរើន ដែលបានស្នើសុំឲ្យលោក កឹម សុខា ឆ្លើយបំភ្លឺចំពោះខ្សែអាត់សំឡេងស្នេហាអសីលធម៌ ដែលសង្ស័យថាជាសម្លេងរបស់លោក៕
