ខេត្តមណ្ឌលគិរី៖អតីតមន្ត្រីអាវុធហត្ថដែលមានរឿងអាស្រូវច្រើនម្នាក់ ព្រមទាំងបក្សពួកត្រូវបានកម្លាំងកងរាជអាវុធហត្ថ ស្រុកអូរាំងនិង ខេត្តមណ្ឌលគិរី ចាប់ខ្លួនបាននិងត្រូវបញ្ជូនទៅទីបញ្ជាការកងរាជអាវុធហត្ថខេត្តមណ្ឌលគិរីនៅព្រឹកថ្ងៃទី២០ ខែមេសា ឆ្នាំ២០១៦នេះ នៅតាមបណ្តោយផ្លូវជាតិលេខ៧៦ ក្នុងភូមិសាស្ត្រតំបន់ព្រៃកាពារអភិរក្សជីវចំរុះសីមា ស្ថិតក្នុងស្រុកអូរាំងនិងស្រុកកែវសីមា។
ប្រតិបត្តិការចាប់ខ្លួនមនុស្សរួមទាំងមានវត្ថុតាងបទល្មើសព្រៃឈើនៅព្រឹកនេះ គឺបានធ្វើឡើងពីសំណាក់កងរាជអាវុធ ហត្ថដែលដឹកនាំដោយលោក សូ សំអាត មេបញ្ជាការអាវុធហត្ថស្រុកអូរាំង។
សេចក្តីរាយការបឋមបានអោយដឹងថា សមត្ថកិច្ចបានឃាត់ខ្លួនអតីតមន្ត្រីកងរាជអាវុធហត្ថឈ្មោះ ស៊ូ ម៉ារិទ្ធ ដែលជាមុខសញ្ញារកស៊ីជួញដូរឈើប្រណីតយ៉ាងសកម្មក្នុងស្រុកអូរាំងនិងស្រុកកែវសីមា។ហើយក្នុងនោះគេក៏បានឃាត់ខ្លួនបក្សពួក អតីតមន្ត្រីកងរាជអាវុធហត្ថខាងលើ រួមនិងរថយន្តម៉ាកឡិចស៊ីសពណ៌ខ្មៅ១គ្រឿងព្រមទាំងឈើប្រណីតចំនួន០៨ដុំ ផងនោះ ទៀត។
ប្រភពព័ត៌មានដដែលបានអោយដឹងថា លោក ស៊ូ ម៉ារិទ្ធ ជាមន្ត្រីកងរាជអាវុធហត្ថម្នាក់ ដែលមានរឿងអាស្រូវច្រើន ហើយត្រូវបានប្រមុខថ្នាក់ដឹកនាំខ្លួនដកចេញពីកាងារកាលពីកន្លងមក។ហើយព័ត៌មានដែលទទូលបានកន្លងមកនោះ ឈ្មោះ នេះ បានប្រព្រឹត្តនូវសកម្មភាពល្មើសមួយចំនួនដូចជា ខ្លួនជាមន្ត្រីផង ជាមុខសញ្ញារកស៊ីឈើខុសច្បាប់ផង ធ្លាប់យកកាំភ្លើងខ្លី ភ្ជង់ លោកអភិបាលស្រុកកែវសីមា ស៊ិន វណ្ណវុឌ្ឍ ក្នុងយុទ្ធនាការចាប់រថយន្តខុសបច្ចេកទេស ធ្លាប់ត្រូវបានព្រះរាជអជ្ញាចេញដឺការ ឡោមព័ទ្ធផ្ទះពាក់ព័ន្ធនិងលាក់ទុកឈើប្រណីតដ៏ច្រើនចំនួន២លើក ហើយនិងករណីផ្សេងៗទៀត ។ ដោយឡែកគេនៅមិនទាន់ទទួលព័ត៌មានលម្អិត ថាតើសមត្ថកិច្ចនិងចាត់ការលើករណីឃាត់ខ្លួនអតីតមន្ត្រី កងរាជ អាវុធហត្ថ និងបក្សពួកយ៉ាងណានោះទេ នៅថ្ងៃដដែលនេះ៕
