មីយ៉ាន់ម៉ា៖យ៉ាងហោចណាស់មនុស្សចំនួន២១នាក់បានស្លាប់ដែលក្នុងនោះរួមទាំងកុមារ៩នាក់ ក្នុងឧបទ្ទវហេតុក្រឡាប់ទូកនៅក្នុងទឹកនៅតំបន់ឆ្នេរសមុទ្ររបស់មីយ៉ាន់ម៉ា នៅរដ្ឋរ៉ាឃីន កាលពីថ្ងៃអង្គារ។នេះបើតាមសារព័ត៌មាន Channel News Asia។
មន្ត្រីអង្គការសហប្រជាជាតិប្រចាំប្រទេសមីយ៉ាន់ម៉ាថ្លែងថា នាវាដឹកអ្នកដំណើរប្រមាណ៦០នាក់បានចេញពីជំរុំទៅផ្សារក្នុងតំបន់មួយ ហើយក៏បានក្រឡាប់លិច។ លោកបញ្ជាក់ថា ភាគច្រើនពួកគេជាអ្នកស្វែងរកកន្លែងរស់នៅក្នុងប្រទេស។
គួរបញ្ជាក់ថា រដ្ឋរ៉ាឃីនជារដ្ឋនៅភាគខាងលិចនៃប្រទេសមីយ៉ាន់ម៉ា ជនជាតិភាគតិចរ៉ូហ៊ីងយ៉ាកាន់សាសនាឥស្លាមបាត់បង់ផ្ទះសម្បែងរាប់ពាន់ខ្នងកាលពីពេលហិង្សាសាសនាកើតឡើងតាំងពីឆ្នាំ២០១២ ហើយពួកគេទទួលរងការរើសអើង ហើយពលរដ្ឋភាគច្រើននៅទីនោះធ្វើដំណើរតាមទូក៕
