រាជធានីភ្នំពេញ៖បុរសស្រវឹងម្នាក់បើករថយន្តស៊េរីទំនើបមួយគ្រឿងក្នុងស្ថានភាពស្រវឹងជោកទៅបុករនាំងថ្មពុះចែកទ្រូងផ្លូវបាក់អស់៦កង់ និងរថយន្តរងការខូចខាតធ្ងន់ធ្ងរ។ ហេតុការណ៍នេះកើតឡើងនាម៉ោង២ និង០០នាទីរំលងអធ្រាត្រ ឈានចូលថ្ងៃទី២៧ ខែមេសា ឆ្នាំ២០១៦ ស្ថិតតាមបណ្តោយផ្លូវ២៧១ ក្នុងសង្កាត់ទឹកល្អក់ទី៣ ខណ្ឌទួលគោក។
តាមសាក្សីបានឃើញហេតុការណ៍និយាយថា នៅម៉ោងខាងលើគេបានឃើញបុរស្រវឹងម្នាក់ បានបើករថយន្ត ម៉ាក Audi ពណ៌ខ្មៅ ស្លាកលេខភ្នំពេញ 2AG-6676 ក្នុងទិសដៅពីត្បូងទៅជើង តាមបណ្តោយផ្លូវ២៧១ កែងនិងផ្លូវ២០០៤ លុះបើកមកដល់ចំណុចកើតហេតុនេះ ដោយសារអ្នកបើកបរស្រវឹងនោះ បានបើករថយន្តរ៉េចង្កូត ទៅបុកថ្មពុះចែកទ្រូងផ្លូវបណ្តាលឲ្យបាក់៦កង់ និងរថយន្តដាច់កង់មុខ ផ្នែកខាងស្តាំ មិនអាចបន្តដំណើរទៅមុខទៀតបាន រីឯអ្នកបើកបរពុំមានរងរបួសនោះទេ ។
ក្រោយកើតហេតុទាំងមនុស្ស ទាំងរថយន្ត ត្រូវបានបញ្ជួនទៅកានស្នងការដ្ឋាន នគរបាលក្រុងភ្នំពេញ ដើម្បីរង់ចាំដោះស្រាយគ្នានៅពេលក្រោយ៕
