កូរ៉េខាងជើង៖គណបក្សកម្មករដែលកំពុងកាន់អំណាចក្នុងប្រទេសកូរ៉េជើងនឹងធ្វើសមាជលើកដំបូងក្នុងរយៈពេលជិត៤០ឆ្នាំរបស់ខ្លួនក្នុងខែឧសភាខាងមុខនេះ បន្ទាប់ពីលោក គីម ជុងអ៊ុន ឡើងកាន់អំណាច ដែលសមាជនេះគឺជាសមាជលើកទី១ក្នុងរយៈពេលជិត៤០ឆ្នាំមកនេះ។ នេះបើយោងតាមការផ្សាយពីបណ្ដាញសារព័ត៌មាន BBC។
សមាជដែលនឹងធ្វើឡើងនៅទីក្រុងព្យុងយ៉ាងនេះគឺជាសមាជទី៧របស់គណបក្សកម្មករ ហើយវាជាសមាជលើកទី១បន្ទាប់ពីលោក គីម ជុងអ៊ុន ឡើងកាន់អំណាច។ សមាជចុងក្រោយរបស់បក្សនេះគឺធ្វើឡើងកាលពីឆ្នាំ១៩៨០ ពោលគឺមុនលោក គីម ជុងអ៊ុន កើតទៅទៀត ដោយលោក គីម ជុងអ៊ុន ត្រូវគេជឿថាពេលនេះមានអាយុ៣៣ឆ្នាំ ឬកើតក្នុងឆ្នាំ១៩៨៣។
យោងតាមសេចក្ដីថ្លែងការណ៍ដែលបានផ្សព្វផ្សាយដោយសារព័ត៌មានរដ្ឋរបស់កូរ៉េខាងជើង KCNA សមាជនេះនឹងធ្វើឡើងនៅថ្ងៃទី៦ ខែឧសភា ប៉ុន្តែមិនបានបញ្ជាក់ថានឹងធ្វើចំនួនប៉ុន្មានថ្ងៃនោះទេ។ សមាជចុងក្រោយរបស់បក្សនេះកាលពីឆ្នាំ១៩៨០បានប្រព្រឹត្តទៅចំនួន៤ថ្ងៃ៕
