ក្រុមឧទ្ទាមអ៊ីស្លាមនៅហ្វីលីពីនគំរាមសម្លាប់ចំណាប់ខ្មាំង៣នាក់ទៀត
ហ្វីលីពីន៖យោងតាមសារព័ត៌មាន Bangkok Post បានផ្សាយថា ក្រុមឧទ្ទាមបំបែកខ្លួននៅក្នុងប្រទេសហ្វីលីពីនបានបញ្ចេញសារព្រមានសម្លាប់ចំណាប់ខ្មាំង៣នាក់ទៀតកាលពីម្សិលមិញ បន្ទាប់ពីពួកគេបានកាត់ក្បាលចំណាប់ខ្មាំងមួយរូបកាលពីជាង១សប្ដាហ៍មុន។
ប្រភពដដែលបន្តថា មនុស្ស៣នាក់ក្នុងនោះមានជនជាតិកាណាដា ជនជាតិន័រវេ និងហ្វីលីពីនបានអំពាវនាវរកការជួយសង្គ្រោះពីប្រទេសហ្វីលីពីន និងរដ្ឋាភិបាលកាដាណា តាមរយៈវីដេអូមួយដែលត្រូវបានគេបង្ហោះចូលប្រព័ន្ធ YouTube កាលពីម្សិលមិញ។
គួរបញ្ជាក់ថា ក្រុមអាប៊ូសាយយ៉ាស់ដែលមានមូលដ្ឋាននៅភាគខាងត្បូងហ្វីលីពីនបានប្រកាសកាលពីសប្ដាហ៍មុនថា ពួកគេបានសម្លាប់ចំណាប់ខ្មាំងជនជាតិកាណាដាម្នាក់ឈ្មោះ John Ridsdel នៅពេលឱសានវាទបានកន្លងផុតទៅកាលពីថ្ងៃទី២៥ខែមេសាកន្លងមកនេះ៕
