ខេត្តកណ្តាល៖បុរសអ្នកលក់តែគុជម្នាក់ត្រូវបានយុវជនម្នាក់កាប់០២កាំបិតបុ័ងតោបណ្តាលឲ្យត្រូវក្បាលផ្នែកចំហៀងខាងឆ្វេង និងដាច់ប្រអប់ដៃខាងឆ្វេងរងរបួសយ៉ាងធ្ងន់ធ្ងរដាច់ប្រអប់ដៃ។ ហេតុការណ៍នេះកើតឡើង នៅវេលាម៉ោង០៧ និង០៥នាទីព្រឹក ថ្ងៃទី០៩ ខែឧសភា ឆ្នាំ២០១៦ ស្ថិតនៅ មុខសាលាបឋមសិក្សាក្រពើហា សង្កាត់ព្រែកឫស្សី ក្រុងតាខ្មៅ ខេត្តកណ្តាល។
សមត្ថកិច្ចអោយដឹងថា ជនរងគ្រោះមានឈ្មោះ ឡៅ ចាន់ក្តឹប ភេទប្រុស អាយុ៣៩ឆ្នាំ ទីលំនៅភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ លក់តែគុជ។ ចំណែកជនល្មើសមានឈ្មោះ ដួង ចាន់រស្មី ភេទប្រុស អាយុ២៤ឆ្នាំ ទីលំនៅ ភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរ មិនពិតប្រាកដ ត្រូវបានសមត្ថកិច្ចធ្វើការឃាត់ខ្លួន ដោយដកហូតបាន កាំបិតបុ័ងតោ ដងឈើ ចំនួន០១ និងប្រអប់ក្រដាសសំរាប់ដាក់ កាំបិត០១។
ប្រភពបន្តថា មុនកើតហេតុជនរងគ្រោះកំពុងអង្គុយលក់តែគុជ នៅកន្លែងកើតហេតុខាងលើ ពេលនោះស្រាប់តែជនល្មើសបានដើរកាន់កាំបិតបុ័ងតោកាប់ទៅលើជនរងគ្រោះ ចំនួន០២ កាំបិតបណ្តាលឲ្យត្រូវក្បាលផ្នែកចំហៀងខាងឆ្វេងនិងដាច់ប្រអប់ដៃខាងឆ្វេង ហើយបានរត់គេចខ្លួនបាត់។ ទោះបីយ៉ាងណា ដោយយោងចម្លើយច្បាស់លាស់ពីជនរងគ្រោះកម្លាំងជំនាញក្រុង សហការជាមួយកម្លាំងនគរ បាលប៉ុស្តិ៍រដ្ឋបាល សង្កាត់ព្រែកឫស្សី និងប៉ុស្តិ៍រដ្ឋបាលសង្កាត់ដើមមៀនបានស្រាវជ្រាវឃាត់ខ្លួនជនល្មើសបាននៅវេលាម៉ោង០៩ និង៤០នាទីព្រឹក ថ្ងៃដដែលបញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ រួមនិងវត្ថុតាង (កាំបិត)។
នៅចំពោះមុខសមត្ថកិច្ចជនល្មើសបានសារភាពថា ខ្លួនពិតជាបានធ្វើសកម្មភាពកាប់ទៅលើជនរងគ្រោះពិត ប្រាកដមែន ព្រោះខឹងជនរងគ្រោះបានវាយម្តាយរបស់ខ្លួនកាលពីប៉ុន្មានថ្ងៃមុន៕
