រាជធានីភ្នំពេញ៖ប្រមុខរាជរដ្ឋាភិបាលកម្ពុជានៅព្រឹកមិញនេះ បានព្រមានថា ការធ្វើបដិវត្តពណ៌គឺ «ពណ៌អីក៏ដោយ ឲ្យតែធ្វើខុសគឺចាប់ទាំងអស់ គុកធ្វើឡើង ដើម្បីអ្នកខុស» ។ សម្តេចបានបង្ហើបថាអ្នកឧបត្ថម្ភថវិកាបោះអាវសម្រាប់ក្រុមអង្គការសង្គមស៊ីវិលធ្វើយុទ្ធនាការ «ថ្ងៃចន្ទពណ៌ខ្មៅ» គឺត្រូវបានស្គាល់មុខអស់ហើយ។
ការមានប្រសាសន៍ខាងលើបែបនេះ ក្នុងឱកាសដែលអញ្ជើញជាអធិបតីចែកសញ្ញាបត្រជូនដល់និស្សិតវិទ្យាស្ថានវ៉ាន់ដា នៅមជ្ឈមណ្ឌលកម្សាន្ត និងពិព័រណ៍កោះពេជ្រ ។
លោកនាយករដ្ឋមន្រ្តីបានថ្លែងអះអាងថា រាជរដ្ឋាភិបាលមិនអនុញ្ញាតឲ្យសន្តិសុខមនុស្សរាប់លាននាក់ ត្រូវបានបំផ្លាញដោយបុគ្គល ៤-៥នាក់នោះទេ ។ ទន្ទឹមនោះសម្តេចក៏បានជំរុញឲ្យមន្ត្រីអង្គការសង្គមស៊ីវិលស្វែងរកមេធាវីពូកែ ដើម្បីការពារក្តីដល់មន្ត្រីអង្គការសិទ្ធិមនុស្សដែលជាប់ឃុំមិនអាចដាក់សម្ពាធលើតុលាការ នោះទេ ។
លោកបានសង្កត់ធ្ងន់ថា អ្នកមានសិទ្ធិតែសិទ្ធិមានព្រំប្រទល់ជាមួយសិទ្ធិអ្នកដទៃអ្នកប្រើសិទ្ធិ សូមកុំប្រើសិទ្ធិ ដើម្បីបំពានអ្នកដទៃ។ រាជរដ្ឋាភិបាលត្រូវការពារនិងរក្សាសន្តិភាព ស្ថេរភាព ដើម្បីការអភិវឌ្ឍ បុគ្គលធ្វើខុសត្រូវទទួលខុសត្រូវចំពោះមុខច្បាប់ បើមិនធ្វើខុសគ្មានការចាប់ខ្លួនទេ។ បើទាមទារដោះលែងគ្មានលក្ខខណ្ឌមិនចាំបាច់មានច្បាប់នោះទេ ៕
