ខេត្តបាត់ដំបង៖ប្រជាពលរដ្ឋចំនួន១៣៤គ្រួសារ រស់នៅក្នុងភូមិតានួត ឃុំព្រះផុស ស្រុកគាស់ក្រឡ ស្នើរសុំដល់អាជ្ញាធរខេត្តបាត់ដំបង ជួយដោះស្រាយបញ្ហាដីធ្លីរបស់ពួកគាត់ ដែលធ្លាប់បានអាស្រ័យផល៨ឆ្នាំមកហើយ។
លោកយួម យឿប អាយុ៤៦ឆ្នាំរស់នៅភូមិតានួត ឃុំព្រះផុស ស្រុកគាស់ក្រឡ បានរៀបរាប់អោយដឹងនៅថ្ងៃទី០៩ ខែឧសភា ឆ្នាំ២០១៦នេះថា ដីអាស្រ័យផលរបស់លោកចំនួន២ហិកតានៅខាងមុខផ្ទះដែលលោកបានដាំដុះដំណាំតាំងពីយូមកហើយគឺរយះពេលប្រមាណ៨ឆ្នាំទៅ១០ឆ្នាំ មកនេះត្រូវបាន លោក សង ថន រារាំងមិនអោយធ្វើជាបន្ដរបន្ទាប់ដោយអះអាងថាជាដីរបស់លោក រហូតប្ដឹងពួកលោកទៅតុលាការម្ដងជា២ដង ពួកលោកនិងប្រជាពលរដ្ឋដ៍ទៃទៀតមិនចេញទៅណាឡើយ សុខចិត្តជាប់គុកឬស្លាប់ តែមិនសុខចិត្តអោយប្រពន្ធ កូនចៅដាច់ពោះស្លាប់ដោយសារអត់មានបាយហូបនោះទេ។
លោកបន្ដថា៖ លោកនិងប្រជាពលរដ្ឋឯទៀតមិនបានចូលដាំដំណាំលើដីរបស់លោកសង ថនឡើយ ផ្ទយទៅវិញពួកគាត់បានធ្វើការដាំដុះតែនៅលើដីរបស់ពួកគាត់តែប៉ុណ្ណោះ ដែលក្នុងមួយគ្រួសារៗមានដីចំនួនពី២ទៅ៣ហិកតាបានធ្វើស្រែនិងចំការរហូតមក តែបើលោកសង ថន អះអាងថាដីរបស់លោកម្ដេចមិនហាមឃាត់ពួកគាត់តាំងពីចាប់ផ្តើមធ្វើតាំងពីដំបូងមកកាលពី១០ឆ្នាំមុន។
អាជ្ញាធរមូលដ្ឋានបានបញ្ជាក់ប្រាប់ប្រជាពលរដ្ឋថាផ្ទៃដីដែលមានបណ្ណ័គ្រប់គ្រងរបស់អតីតលោកឧញ្ញ៉ាសង សន គឺមានតែនៅតែតំបន់កុយ វែងដែលមានចម្ងាយ៦គីឡូម៉ែត្រពីផ្ទះប្រជាពលរដ្ឋប៉ុណ្ណោះ តែបែរជាលោកសង ថន បំប៉ោងប្លង់ បំពានឈូសឆាយចូលលើដីប្រជាពលរដ្ឋធ្លាប់ធ្វើរាល់ៗឆ្នាំទៅវិញ។
អ្នកស្រី យឿក សុផល អាយុ៤៦ឆ្នាំ បានអោយដឹងដែរថា កាលពីថ្ងៃទី០៩ ខែឧសភាកន្លងមកនេះ លោកសង ថន និងបក្សពួកកូនចៅបានចូលមករារាំងមិនអោយពួកគាត់ចុះភ្ជួររាស់ទៀត បើបែបនេះប្រជាពលរដ្ឋរស់នៅតំបន់ដាច់ស្រយាលនេះបានអីចិញ្ចឹមជីវិត ព្រោះក្រៅពីមុខរបរដាំដុះដំណាំកសិកម្ម ពួកគាត់មិនមានការងារអ្វីផ្សេងឡើយ។
បញ្ហាទំនាស់ដីធ្លីខាងលើនេះពលរដ្ឋបានលើកឡើងថា ក្នុងរយៈពេលកំពុងទំនាស់ លោកសង ថន បានប្រើពាក្យគំរាមពលរដ្ឋថា ប្រយ័ត្នប្ដីមិនរស់(ងាប់ចោលប្រពន្ធកូន)បើនៅតែបន្តចូលធ្វើលើដីរបស់លោកទៀត។
លោកស្រីបានរៀបរាប់ទាំងទឹកមុខអួលអាក់ថា៖ ពួកគាត់រស់នៅលើទីតាំងនេះជាយូរមកហើយដោយមានជីវភាពក្រលំបាកណាស់ ខែវស្សាធ្វើស្រូវមិនបានផល ហើយខែប្រាំងវិញដំណាំចំការនិងដំណាំរួមផ្សំផ្សេងៗត្រូវក្រៀមស្វិត ហួតហែងគ្មានទឹកប្រើប្រាស់ និងស្រោចស្របឡើយមានតែផ្ទៃដីស្រែចំការប៉ុន្មានហិកតាប៉ុណ្ណោះដែលអាស្រ័យផលតាំងពី២០០៨មក តែពេលនេះត្រូវបានអតីត លោកឧកញ៉ាសង ថន អះអាងថាជាដីរបស់គាត់ទៀតខណះដែលលោកឧកញ៉ា រូបនេះមានដីរាប់ពាន់ហិកតាហើយនៅមានចិត្តលោភលន់ចង់មាន ចង់បានលើអ្នកក្រទៀត។
បញ្ហានេះត្រូវបានអតីត លោកឧកញ៉ាសង ថន បានបំភ្លឺថា៖ ដីដែលមានបញ្ហានេះលោកបានទិញពីឃុំចំនួន២០០ហិកតាកាលពីឆ្នាំ២០០០មានលេខកូតកាត់ចេញជម្រកព្រៃឈើអស់ហើយ ប៉ុន្ដែនៅមិនទាន់ដឹងចំនួនប៉ុន្មានហិកតាច្បាស់លាស់ព្រោះនៅមិនទាន់កាត់ចំណីភ្នំនិងចំណីផ្លូវនៅឡើយ ក្រោយមានការវាស់វែងហើយទើបដឹងប៉ុន្មានហិកតាច្បាស់លាស់។ លោកបន្តថាពួកគាត់មិនបានលួចដីពលរដ្ឋទេ គឺពលរដ្ឋទៅវិញទេដែលនាំគ្នាចូលមកធ្វើរំលោភលើដីរបស់លោក ហើយបញ្ហារដែលថាលោកបានប្រើពាក្យគំរាម កំហែងទៅពលរដ្ឋនោះគឺមិនមានទេ លោកថាអ្វីៗដោះស្រាយតាមច្បាប់។
ចំណែកលោកយីវ សំអាត មេឃុំព្រះផុសបានអោយដឹងក្រុមអ្នកសារព័ត៌មានយើងដឹងថា៖ បញ្ហាខាងលើផ្ទុះឡើងមកយូរហើយ ហើយកំពុងឋិតនៅក្នុងការគិតគូររកដំណោះស្រាយដែរ លោកក៍ធ្លាប់បានប្រាប់អោយប្រជាពលរដ្ឋរបស់លោកដែលមានការពាក់ពន្ធ័ទាំង១៣១គ្រួសារអោយមានការអត់ធ្មត់បន្ដិចសិនរង់ចាំឱកាសសមស្របណាមួយអាចនិងមានការដោះស្រាយបាន ។ លោកថាចំណែកឯខាងភាគី លោកសង ថន មិនគួរណាដើរបង្កររឿង ចោលពាក្យសម្តីខ្លះ ធ្វើអោយមានការភ័យខ្លាចដល់ប្រជាពលរដ្ឋក្រីក្រនិងស្លូតត្រង់ដូច្នេះឡើយ៕ ប៉ែនសុផល
