អត្ថបទ៖ លោក សុត្ថារ៉ូ
សៀមរាប៖ការផ្សងប្រផ្នូលក្នុងពិធីច្រត់ព្រះនង្គ័ល តាមរយៈការបរិភោគរបស់ គោឧសភរាជ កាលពីថ្ងៃទី ២៤ ខែឧសភា ឆ្នាំ២០១៦ ដែលប្រារព្ធឡើងនៅខេត្តសៀមរាប បានឱ្យដឹងថា ផលកសិកម្មឆ្នាំនេះ ទទួលបានទិន្នផលល្អប្រសើរ។
ព្រហ្មណ៍ព្រះរាជគ្រូ បានក្រាបបង្គំទូលថ្វាយ ព្រះករុណាជាអម្ចាស់ជីវិតលើត្បូង ព្រះមហា ក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ថា អាហារទាំង ៧មុខ ដែលរួម មាន៖ ស្រូវ ពោត សណ្តែក ល្ង ស្មៅ ទឹក និងស្រា ដែលបានតម្កល់លើតុកណ្តាលទីព្រះស្រែ ដើម្បី ឱ្យ គោឧសភរាជ បរិភោគដែលជាកិច្ចផ្សងប្រថ្នូលតាមបវេណីនោះ ឃើញថា មានអាហារតែ ៣ មុខ ប៉ុណ្ណោះ ដែលត្រូវបាន គោឧសភរាជ បរិភោគ រួមមាន៖ ស្រូវ ពោត និងសណ្តែក។
តាម រយៈនេះ បានបង្ហាញថា ដំណាំស្រូវឆ្នាំនេះ ទទួលបានទិន្នផលល្អប្រសើរ រហូតដល់ទៅ ៩០% ដំណាំពោត ក៏ទទួលបានទិន្នផលល្អប្រសើររហូតដល់ទៅ ៩០% និងដំណាំសណ្តែក ក៏ទទួលបានទិន្នផលល្អ ប្រសើរដូចគ្នា រហូតដល់ទៅ ៩៥% ឯណោះ។
ជាមួយ នឹងការប្រកាសនូវលទ្ធផលផ្សងប្រផ្នូលដូច្នេះ អាចារ្យព្រហ្មព្រលោហិត បានលើកឡើងថា នេះគឺជាការផ្សងប្រផ្នូលទៅតាមទំនៀមទម្លាប់ព្រះរាជវេណី នៃព្រះរាជពិធីច្រត់ព្រះនង្គ័ល ដែលមានតាំងពីបុរាណកាលមកប៉ុណ្ណោះក៏ដូចជាការប្រកាស ថា រដូវវប្បមង្គលចូលមកដល់ហើយ។ ដូច្នេះសូមប្រជាកសិករ ត្រៀមលក្ខណៈសម្បត្តិប្រុងប្រៀបរៀប ចំការងារបង្កបង្កើនផលឲ្យបានទទួលនូវទិន្នផលខ្ពស់ ដើម្បីលើកស្ទួយកម្រិតជីវភាពបានល្អប្រពៃ។
សូមបញ្ជាក់ថា ឆ្នាំនេះ ក៏ដូចឆ្នាំមុនៗដែរ ព្រះរាជពិធីច្រត់ព្រះនង្គ័ល ត្រូវបានប្រារព្ធ ធ្វើឡើងក្រោម ព្រះរាជាធិបតីភាពដ៏ខ្ពស់ខ្ពស់បំផុតរបស់ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរព សក្ការៈដ៏ខ្ពង់ខ្ពស់បំផុត។ ជាមួយគ្នានេះ វត្តមានដ៏ខ្ពង់ខ្ពស់របស់ថ្នាក់ដឹកនាំកំពូលៗ របស់ជាតិ ក៏បានអញ្ជើញចូលរួម ក្នុងព្រះ រាជពិធីច្រត់ព្រះនង្គ័លនេះផងដែរ។
សម្រាប់ព្រះរាជពិធីច្រត់ព្រះនង្គ័ល នៅឆ្នាំ២០១៦នេះ ព្រះករុណាជាអម្ចាស់ជីវិត លើត្បួង ព្រះមហាក្សត្រ នៃព្រះរាជាណាចក្រកម្ពុជា ទ្រង់បានសព្វព្រះរាជហឬទ័យ ប្រោស ព្រះរាជទាន ដល់ ឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និង នេសាទ ជាអ្នកកាន់នង្គ័លទី១ ឯកឧត្តម ឃឹម ប៊ុនសុង អភិបាល នៃគណៈអភិបាលខេត្ត សៀមរាប ច្រត់ព្រះនង្គ័លជា ស្តេចមាឃ និងលោកជំទាវ គួយ ណាលីន ជាមេហូ និង ឯកឧត្តម អ៊ិន រដ្ឋាសេរី ជំនួយការសម្តេចចៅហ្វាវាំង គង់ សំអុល ជាអ្នកកាន់នង្គ័លទី៣៕
