បាកដាដ៖មនុស្សចំនួន១២នាក់បានស្លាប់ និងច្រើននាក់ផ្សេងទៀតរងរបួសក្នុងហេតុការណ៍បាញ់មួយក្នុងក្លឹបកម្សាន្តមួយកន្លែងនៅតំបន់ Baquba ចម្ងាយប្រមាណ ៦៥គីឡូម៉ែត្រពីទីក្រុងបាកដាដ ប្រទេសអ៊ីរ៉ាក់។
បើយោងតាមការចេញផ្សាយរបស់សារព័ត៌មាន Daily Mail នៅថ្ងៃទី៣០ ខែឧសភាបានឲ្យដឹងថា នេះគឺជាទង្វើរបស់ក្រុមសកម្មប្រយុទ្ធ ISIS បានបើកការបាញ់ប្រហារទៅលើក្រុមមនុស្សនៅក្នុងក្លឹបកម្សាន្តមួយខណៈមនុស្សជាច្រើនទស្សនាការប្រកួតវគ្គផ្ដាច់ព្រ័ត្រលើកពាន Champions League រវាងក្រុម Real Madrid និង Atletico Madrid។
ប៉ូលិសប្រចាំតំបន់បានឲ្យដឹងថា អ្នកស្លាប់ទាំង ១២នាក់នោះគឺសុទ្ធសឹងជាអ្នកគាំទ្រក្រុមបាល់ទាត់ក្លឹប Real Madrid ដែលមានអាយុចន្លោះពី១៨ ទៅ៣០ឆ្នាំ។ ប្រភពបញ្ជាក់ថា ការបាញ់ប្រហារនោះ ត្រូវបានធ្វើឡើងនៅពេលការប្រកួតចង់តង់ទី២ ពោលគឺមុនពេលចាប់ផ្ដើមប៉េណាល់ទី ក្នុងលទ្ធផល ១-១៕
