ខេត្តកោះកុង៖កម្លាំងនគរបាល ការិយាល័យកណ្តាលប្រឆាំងបទល្មើស នៃស្នងការដ្ឋាននគរបាលខេត្តកោះកុង បានឃាត់ខ្លួនប្តីប្រពន្ធ២នាក់ និងធ្វើការឆែរឆេរកឃើញថ្នាំញៀនចំនួន៣៦៤គ្រាប់ និងឧបករណ៍ជក់មួយចំនួនទៀត។ ការឃាត់ខ្លួននេះធ្វើឡើងនៅវេលាម៉ោង១១ និង៣០នាទីយប់ថ្ងៃទី៣១ ខែឧសភា ឆ្នាំ២០១៦ គ្រាដែលចុះឆែកឆេរផ្ទះ១កន្លែងស្ថិតនៅឃុំបាក់ខ្លង ស្រុកមណ្ឌលសីមា ខេត្តកោះកុង។
ស្នងការរងនគរបាល ទទួលផែនការិយាល័យកណ្តាលប្រឆាំងបទល្មើសខេត្តកោះកុង លោក យឹម ផេង បានឲ្យដឹងថា ជនសង្ស័យទាំង២នាក់ប្តីប្រពន្ធ ដែលត្រូវសមត្ថកិច្ចធ្វើការឃាត់ខ្លួននោះមានឈ្មោះ៖ ទី១-ឈ្មោះ នន់ សារី អាយុ៥៤ឆ្នាំជាប្តី និងទី២- ឈ្មោះ ស៊ីម សុន អាយុ៥៧ឆ្នាំជាប្រពន្ធ មានទីលំនៅភូមិ២ឃុំប៉ាក់ខ្លង ស្រុកមណ្ឌលសីមា ខេត្តកោះកុង ហើយកម្លាំងសមត្ថកិច្ចធ្វើការរឹបអូសបានថ្នាំញៀនចំនួន៣៦៤គ្រាប់ និងឧបករណ៍ជក់១ចំនួន។ លោកបានបញ្ជាក់ថា ករណីខាងលើនេះ លោកបានកសាងសំណុំរឿង បញ្ជូនខ្លួនជនសង្ស័យ២នាក់ប្តីប្រពន្ធ រួមទាំងវត្ថុតាងទៅសាលាដំបូងខេត្ត ដើម្បីចាត់ការទៅតាមនីតិវិធីច្បាប់៕
