ខេត្តកោះកុង៖មនុស្ស២នាក់បានស្លាប់ភ្លាមៗនៅនឹងកន្លែង ខណៈ៧នាក់ផ្សេងទៀតរងរបួសធ្ងន់ស្រាល បន្ទាប់ពីរថយន្តដឹកដែកយកទៅរៀបចំរោងតាំងពិព័រណ៍ក្នុងខេត្តកោះកុងមួយគ្រឿង បានក្រឡាប់ពេលចុះចំណោតអន្ទង់អាំង។ ហេតុការណ៍នេះកើតឡើងនៅគីឡូម៉ែត្រលេខ ៦១-៦២ ក្នុងភូមិសីមាល ឃុំអណ្តូងទឹក ស្រុកបទុមសាគរកាលពីរសៀលថ្ងៃទី០៥ ខែមិថុនា ឆ្នាំ២០១៦នេះ។
មន្ត្រីនគរបាលចរាចរណ៍ ដែលបានចុះទៅដល់កន្លែងកើតហេតុ បានបញ្ជាក់ថា នៅពេលកំពុងបើកចុះចំណោត ស្រាប់តែរថយន្តដាក់លេខ មិនចូល ធ្វើឲ្យល្បឿនរថយន្តចុះកាន់តែលឿន ហើយទាញចង្កូតក្រឡាប់តែម្តង។ មន្ត្រីនគរបាលបន្តថា ក្នុងរថយន្តនេះ មានមនុស្សជិះពីលើ ៩នាក់ ក្នុងនោះ ២នាក់បានស្លាប់ ៣នាក់ របួសធ្ងន់ និង ៤នាក់ទៀតរងរបួសស្រាល។
រថយន្តជួបគ្រោះថ្នាក់ខាងលើនេះ ម៉ាក់ហ៊ីយ៉ាន់ដាយ ពណ៌ស ពាក់ស្លាកលេខតាកែវ 3A-2052។ ទោះជាយ៉ាងណាក្រោយកើតហេតុភ្លាមៗ អ្នករងរបួសត្រូវបានបញ្ជូនទៅមន្ទីរពេទ្យ ដើម្បីជួយសង្គ្រោះ រីឯអ្នកទទួលមរណភាព ត្រូវបានសមត្ថកិច្ចយកទៅរក្សាទុក និង ទាក់ទងទៅក្រុម គ្រួសារ ដើម្បីទទួលយកទៅធ្វើបុណ្យតាមប្រពៃណី៕
