រាជធានីភ្នំពេញ៖អង្គភាពប្រឆាំងអំពើពុករលួយ ACU បានសម្រេចទទួលយកពាក្យបណ្តឹងរបស់ស្ត្រី២នាក់ម្តាយកូន ដែលបានមកប្តឹងអង្គភាពប្រឆាំងអំពើពុករលួយ អំពីករណីឆបោក និងរំលោភសេចក្តីទុកចិត្តរបស់ លោក កឹម សុខា។ ការសម្រេចចិត្តទទួលយកនេះធ្វើឡើងបន្ទាប់ពីបើកកិច្ចពិភាក្សា នៅព្រឹកថ្ងៃទី០៦ ខែមិថុនា ឆ្នាំ២០១៦នេះក្រោមវត្តលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ។
ស្ត្រី២នាក់ដែលត្រូវជាម្តាយ និងកូនបានអះអាងថា ជាប្រពន្ធចុង និងម្តាយក្មេក (ចុង) របស់លោក កឹម សុខា ប្រធានស្តីទីគណបក្សសង្គ្រោះជាតិ។ ស្ត្រី២នាក់ម្តាយ និងកូន បានរៀបរាប់ប្រាប់ ACU នៅព្រឹកមិញថា លោក កឹម សុខា បានលួងលោមពួកគាត់ ឱ្យលក់ផ្ទះសម្បែង ហើយយកលុយឱ្យគាត់ធ្វើការងារបក្សដោយសន្យាផ្តល់សំណងមកវិញឱ្យសមរម ប៉ុន្តែបន្ទាប់ពីលក់ ស្ត្រី២នាក់ខាងលើ អះអាងថា មិនបានទទួលសំណងអ្វីទេពីលោក កឹម សុខា។
លោកទេសរដ្ឋមន្ត្រី បានលើកយកច្បាប់អង្គភាពប្រឆាំងអំពើពុករលួយ មកបញ្ជាក់ថា ច្បាប់ប្រឆាំងអំពើពុករលួយ បានបញ្ជាក់ថា អង្គភាពប្រឆាំងអំពើពុករលួយ មិនអាចចាប់ផ្តើមស៊ើបអង្កេត លើករណីដែលមិនពាក់ព័ន្ធនឹងអំពើពុករលួយបានទេ លុះត្រាតែមានការអនុញ្ញាតពីតុលាការជាមុនសិន។ លោកទេសរដ្ឋមន្ត្រី ឱម យ៉ិនទៀង បានអះអាងថា ការលើកឡើងរបស់ស្ត្រី២នាក់ខាងលើ មិនមានពាក់ព័ន្ធទៅនឹងករណីពុករលួយទេ ប៉ុន្តែជាករណីព្រហ្មទណ្ឌផ្សេងដូចជា រំលោភលើសេចក្តីទុកចិត្ត និងបទល្មើសឆបោកជាដើម៕
