រាជធានីភ្នំពេញ៖នៅព្រឹកថ្ងៃទី០៦ ខែមិថុនា ឆ្នាំ២០១៦នេះ នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងជាប្រធានគណៈកម្មការស្រាវជ្រាវ និងធ្វើកោសល្យវិច្ច័យ បានចាប់ផ្តើមបើកកញ្ចប់ស្នាមមេដៃ អ្នកគាំទ្រគណបក្សសង្គ្រោះជាតិ (CNRP) ដែលហែថ្វាយព្រះមហាក្សត្រដើម្បីធ្វើការស្រាវជ្រាវ និងស៊ើបអង្កេត។
គួររម្លឹកថា កាលពីថ្ងៃទី៣០ ខែឧសភា កន្លងទៅ តំណាងរាស្ត្រមកពីគណបក្សសង្គ្រោះជាតិ តំណាងដោយលោក យ៉ែម បុញ្ញរិទ្ធ បានធ្វើញត្តិមួយអមដោយ ស្នាមមេដៃរបស់ប្រជាពលរដ្ឋចំនួន ១៨ដុំ ស្មើនឹងជាង ១៧ម៉ឺនស្នាមមេដៃ ដង្ហែទៅថ្វាយព្រះមហាក្សត្រខ្មែរ ដោយទាមទារឲ្យដោះលែងមន្ត្រីសិទ្ធិ មនុស្សអាដហុក ៤រូប អគ្គលេខាធិការរងគណៈកម្មាធិការជាតិ រៀបចំការបោះឆ្នោត១រូប។ ក្នុងញត្តិក៏ទាមទារឲ្យដោះលែងសកម្មជនមន្ត្រីជាន់ខ្ពស់ និងតំណាងរាស្ត្រ គណបក្សគណបក្សសង្គ្រោះជាតិ ព្រមទាំងទាមទារឲ្យទម្លាក់ចោលការចោទប្រកាន់ ទៅលើលោក កឹម សុខា ប្រធានស្តីទីគណបក្សសង្គ្រោះជាតិផងដែរ។
គួរបញ្ជាក់ថា ដើម្បីបញ្ជាក់ពីភាពត្រឹមត្រូវ និងចៀសវាងការបោកប្រាស់ព្រះមហាក្សត្រ នាំឲ្យប៉ះពាល់ដល់ព្រះកិត្តិស័ព្ទរបស់ព្រះអង្គនោះ នៅថ្ងៃទី៣១ ខែឧសភា រាជរដ្ឋាភិបាលកម្ពុជា បានសម្រេចប្រគល់ភារកិច្ច ជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រៀបចំស្រាវជ្រាវស្នាមមេដៃ តាមវិធីសាស្ត្រធ្វើកោសល្យវិច្ច័យ ស្រាវជ្រាវពីប្រជាជនដោយផ្ទាល់ ឬតាមវិធីសាស្ត្រផ្សេងៗទៀត៕
