ស្ត្រីវ័យចំណាស់ម្នាក់ឆក់ខ្សែភ្លើង ខណៈកាន់ព្រីដោតខ្សែម៉ូទ័របូមទឹក
ខេត្តពោធិ៍សាត់៖ស្ដ្រីមេម៉ាយកូនស្រី៣នាក់ម្នាក់ត្រូវចរន្តភ្លើងឆក់ស្លាប់ភា្លមៗនៅកន្លែងកើតហេតុ គ្រាដែលកាន់ព្រីភ្លើងដោតខ្សែម៉ូទ័របូមទឹក។ ហេតុការណ៍នេះកើតឡើងនៅល្ងាចថ្ងៃទី៨ ខែមិថុនា ឆ្នាំ២០១៦នេះ នៅចំណុចភូមិអូអញ្ចាញ ឃុំបឹងកន្ទួត ស្រុកក្រគរ ខេត្តពោធិ៍សាត់។
ស្ដ្រីរងគ្រោះឈ្មោះ សុប អេង អាយុ៥៦ឆ្នាំ មានកូនស្រី៣នាក់ មានទីលំនៅកន្លែងកើតហេតុខាងលើ។
តាមសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានទទឹកខ្លួនជោក រួចបានកាន់ព្រីភ្លើងដោតជាមួយខ្សែម៉ូទ័របូមទឹក ដោយបានដាក់ព្រីនឹងដីសើម ពេលដោតទៅស្រាប់តែឆ្លងចរន្ដភ្លើងឆក់ស្លាប់ភា្លមៗនៅកន្លែងកើតហេតុ។ បច្ចុប្បន្នសាកសពត្រូវបានសមត្ថកិច្ច ប្រគល់ឱ្យក្រុមគ្រួសារ ដើម្បីធ្វើបុណ្យតាមប្រពៃណី៕
