ក្រសួងយុត្តិធម៌អះអាងថា មិនលូកដៃចូលសំណុំរឿងលោក កឹម សុខា
រាជធានីភ្នំពេញ៖ថ្លែងប្រាប់អ្នកសារព័ត៌មាន ក្រោយចូលបំភ្លឺនៅរដ្ឋសភា លោក គឹម សន្តិភាព អ្នកនាំពាក្យក្រសួងយុត្តិធម៌ បានអះអាងថា ក្រសួងយុត្តិធម៌នឹងមិនលូកដៃ ក្នុងសំណុំរឿងលោក កឹម សុខា ប្រធានស្តីទីគណបក្សសង្គ្រោះជាតិនោះទេ ក្នុងករណីមិនទៅ បំភ្លឺនៅថ្ងៃទី១៤ ខែមិថុនា ឆ្នាំ២០១៦ខាងមុខ នេះ ព្រោះថា សំណុំរឿងនេះកំពុងស្ថិតក្នុងដៃចៅក្រមស៊ើបសួរ ។ ដូច្នេះ ទុកឲ្យចៅក្រម ស៊ើបសួរ ដែលគាត់កំពុងមាន តួនាទីនាពេលនេះ អនុវត្តភារកិច្ចរបស់ខ្លួន ដោយឈរលើគោលការណ៍ច្បាប់ តាមនីតិវិធីក្រមព្រហ្មទណ្ឌ ដែលមានជាធរមាន។
យ៉ាងណាក៏ដោយ អ្នកនាំពាក្យរូបនោះ មិនឆ្លើយនឹងសំណួរដែលអ្នកសារព័ត៌មានសួរថា តើមានការចាប់ខ្លួនលោក កឹម សុខា ដែរឬទេ ប្រសិនបើលោកមិនចូលឆ្លើយបំភ្លឺតាមដីកាកោះហៅរបស់តុលាការនាថ្ងៃទី១៤ មិថុនាខាងមុខនេះ៕
