ខេត្តកណ្តាល៖ជនសង្ស័យមុខសញ្ញាគ្រឿងញៀន០២នាក់ត្រូវបានកម្លាំងប៉ូលិសប៉ុស្តិរដ្ឋបាលឃុំគគីរធំចាប់ឃាត់ខ្លួនកាលពីវេលាម៉ោង២១ និង០០នាទីយប់ថ្ងៃទី១៤ ខែមិថុនា ឆ្នាំ២០១៦នៅចំណុចតាមផ្លូវជាតិលេខ០១ស្ថិតនៅក្នុងភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល។
ជនសង្ស័យទី០១ឈ្មោះ ភួង សុផា ភេទប្រុស អាយុ១៧ឆ្នាំ ជនជាតិខ្មែរ មុខរបរជាងដំដែកមានទីលំនៅភូមិនិងឃុំកើតហេតុខាងលើ។ទី០២ឈ្មោះ ថន ថៃសេង ភេទប្រុសអាយុ១៥ឆ្នាំ ជនជាតិខ្មែរមុខរបរសិស្សមានទីលំនៅភូមិពោធិមៀវ ឃុំគគីរធំ ស្រុកកៀនស្វាយ។
សមត្ថកិច្ចប៉ុស្តិ៍រដ្ឋបាលឃុំគគីរធំបានឲ្យដឹងថា មុនកើតហេតុកម្លាំងនគរបាលបានធ្វើការល្បាតនៅចំណុចកើតហេតុខាងលើ ក៏ប្រទះឃើញជនសង្ស័យកំពុងជិះកង់ឌុបគ្នា០២នាក់នៅតាមផ្លូវជាតិក៏មានការសង្ស័យហៅឈប់ធ្វើការត្រួតពិនិត្យទៅរកឃើញម្សៅក្រាមពណ៌សរចំនួន០៣កញ្ចប់តូចសង្ស័យសារធាតុញៀន(ម៉ាទឹកកក)សមត្ថកិច្ចក៍បានធ្វើការឃាត់ខ្លួនអ្នកទាំងពីរខាងលើរួមទាំងវត្ថុតាងមកប៉ុស្តិនគរបាលរដ្ឋបាលឃុំគគីរធំដើម្បីសួរនាំនិងបញ្ចូនមកអធិការដ្ឋាននគរបាលស្រុកកៀនស្វាយបន្តសំណុំរឿងតាមនីតិវិធី៕
