បាត់ដំបង៖ប្រជាពលរដ្ឋ២១គ្រួសារក្នុងភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបងបានចេញមុខជាថ្មីស្នើសុំដល់អាជ្ញាធរខេត្តបាត់ដំបងចូលសង់លំនៅដ្ឋាននិងកាន់កាប់ដីរបស់ខ្លួនជាកម្មសិទ្ធឡើងវិញ បន្ទាប់ពីអាក់ខានអាស្រ័យផល២០ឆ្នាំកន្លងមក។
លោកម៉ី យ៉ូន អាយុ៦៨ឆ្នាំជាប្រជាពលរដ្ឋរស់នៅក្រុមទី៩បានអោយដឹងថា: ដីលំនៅដ្ឋាននិងដីស្រែរបស់ពួកចំនួនជាង២ហិកតាក្នុងភូមិសាស្ត្រខាងលើប្រជាពលរដ្ឋគ្រប់គ្រងតាំងពីឆ្នាំ១៩៧៩មកម្លេះ រហូតមកដល់ឆ្នាំ១៩៩១លោករ៉យ វុទ្ធី អតីតអភិបាលស្រុកឯកភ្នំបានសុំទិញដីទាំងនេះក្នុងតម្លៃ៧ជីមាសពីប្រជាពលរដ្ឋដើម្បីរៀបចំផ្សារ តម្រូវអោយប្រជាជនចាកចេញពីទីលំនៅទាំងនេះតែម្តងប៉ុន្តែមិនបានទូទាត់មាសតាមការសន្យាឡើុយដោយគ្រាន់តែជួយដោះស្រាយដីគោលនយោបាយបានមួយចំនួនប៉ុណ្ណោះ ហើយពួកគាត់ដែលមិនទាន់ទទួលបានការដោះស្រាយបានត្រឹមតែរងចាំការសន្យាឆ្លងកាត់រហូតអណត្តិអភិបាលស្រុកចំនួន៥ហើយមកទល់បច្ចុប្បន្ននេះនៅតែមិនអាចរកដំណោះស្រាយជូនប្រជាពលរដ្ឋបាន។
អ្នកស្រីសួង ឌី អាយុ៥៦ឆ្នាំបានអោយដឹងដែរថា: ដោយសារប្រជាពលរដ្ឋមិនឃើញមានការទូរទាត់សំណងលើគំរោងអភិវឌ្ឍន៍ផ្សាររបស់ស្រុក ខ្លះក៍បាននាំគ្នាមកចាក់ដីនិងដាំបង្គោលរបងតែត្រូវអាជ្ញាធរស្រុកមិនអនុញ្ញតិអោយធ្វើ ពេលនេះពួកគាត់មិនអាចស៊ូទ្រាំនិងការរងចាំដំណោះស្រាយទៀតឡើយព្រោះការរងចាំរហូត២០ឆ្នាំមកហើយ។
លោកឃិត ឃន អាយុ៧០បានសំណូមពរដល់ឯកឧត្តម ចន្ទ័ សុផល អភិបាលខេត្តបាត់ដំបង ពិសេសសម្តេចតេជោ ហ៊ុន សែន និងលោកជំទាវជួយដោះស្រាយបញ្ហារ៉ាំរ៉ៃអោយពួកគាត់ជាប្រជាពលរដ្ឋស្លូតត្រង់ផង ព្រោះអស់ជំនឿលើមន្ត្រីថ្នាក់ស្រុកហើយ។
លោកឡុង សុភឿន អភិបាលស្រុកឯកភ្នំថ្មីនៅថ្ងៃទី១៥ ខែមិថុនា ឆ្នាំ២០១៦នេះបានលើកឡើងថា: បញ្ហាខាងលើនេះមន្ត្រីរបស់លោកនិងចុះពិនិត្យ រៀបចំឯកសារឡើងវិញដោយធ្វើបច្ចុប្បន្នភាពរកចំនួនប្រជាពលរដ្ឋ និងផ្ទៃដីជាក់ស្តែងដើម្បីមានវិធានការបន្តរថាតើប្រជាពលរដ្ឋពួកគាត់ចង់បានយ៉ាងម៉េច ជំហររបស់ស្រុកនិងព្យាយាមដោះស្រាយជូនប្រជាពលរដ្ឋតាមនិតិវិធី៕ ប៉ែនសុផល
