ភ្នំពេញ៖ក្រុមសង្ស័យដែលជាមេខ្លោង និងធ្វើសកម្មភាពលួចរថយន្តយ៉ាងសកម្មចំនួន ២នាក់ត្រូវបានកម្លាំងនគរបាលខណ្ឌមានជ័យសហការជាមួយនគរបាលប៉ុស្តិ៍ស្ទឹងមានជ័យនិងកម្លាំងកងអន្តរាគមន៍ពិសេសនៃស្នងការនគរបាលរាជធានីភ្នំពេញបានឃាត់ខ្លួនជាបន្តបន្ទាប់ ដោយដកហូតបានរថយន្តចំនួន២គ្រឿង ម៉ូតូមួយគ្រឿងនិងអាវុធខ្លីក្នុងប្រតិបត្តិការនេះធ្វើឡើងកាលពីវេលាម៉ោង១០ និង ៣០នាទីព្រឹកថ្ងៃទី១៦ ខែមិថុនា ឆ្នាំ២០១៦ នៅផ្ទះសំណាក់យីហោ ចាក់អង្រែក្រោម ផ្លូវជាតិលេខ ២ ភូមិព្រែកតាឡុង ក្នុងសង្កាត់ចាក់ក្រោម ខណ្ឌមានជ័យ។
លោក ហួរ ម៉េងវ៉ាង អធិការរងនគរបាលខណ្ឌមានជ័យបានប្រាប់ឱ្យដឹងថា ជនសង្ស័យដែលបានឃាត់ខ្លួនទាំងពីរនាក់មានទី១-ឈ្មោះ នៅ សុខឡុង ភេទប្រុស អាយុ ២១ ឆ្នាំ មុខរបរមិនពិតប្រាកដ មានទីលំនៅក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ (ជាមេខ្លោងនិងជាម្ចាស់អាវុធ)ឃាត់ខ្លួនបាននៅក្នុងផ្ទះសំណាក់ខាងលើ។ទី២-ឈ្មោះ ស៊ុំ វិជ្ជា ភេទប្រុស អាយុ ២៦ឆ្នាំ លក់ទំនិញបោះដុំមួយកន្លែង ដែលមានទីតាំងនៅក្រុងតាខ្មៅ ខេត្តកណ្តាល។
ដោយមានការចង្អុលបង្ហាញពីលោក តេង ស៊ីណូ អធិការនគរបាលរងខណ្ឌមានជ័យនោះ កម្លាំងរបស់លោកបានធ្វើការស្រាវជ្រាវ និងចុះប្រតិបត្តិការរហូតឈានទៅដល់ការឃាត់ខ្លួនបក្សពួកជនសង្ស័យទាំងពីនាក់ខាងលើជាបន្តបន្ទាប់ដោយធ្វើការដកហូតបានរថយន្តចំនួនពីគ្រឿង គឺ ម៉ាកកាម៉ារីបាឡែន ពណ៌ស ពាក់ស្លាកលេខភ្នំពេញ២Y-៩៤៣៧ មួយគ្រឿង និងម៉ាក CRV ពណ៌សមបកឪឡឹក ពាក់ស្លាកលេខភ្នំពេញ២D-៩៤៨៨ មួយគ្រឿង និងម៉ូតូម៉ាកហុងដា C125 ព៌ណខ្មៅ ពាក់ស្លាកលេខកណ្តាល១H-៦០២០ មួយគ្រឿង រួមទាំងអាវុធខ្លីម៉ាកឡុក ព៌ណខ្មៅ មួយដើម មានគ្រាប់ចំនួន ១២គ្រាប់ទៀតផង។
តាមប្រភពដដែលបានប្រាប់ឱ្យដឹងថា ប្រតិបត្តិការនេះដែរគឺបានធ្វើឡើងក្រោយពីទទួលបានពាក្យបុរសជាជនរងគ្រោះម្នាក់ឈ្មោះ ឌឿង រិទ្ធី អាយុ ៣១ឆ្នាំ ម្នាក់ស្នាក់នៅផ្ទះលេខ ០៦ ផ្លូវលេខ ១២ ភូមិទ្រា ៤ សង្កាត់ស្ទឹងមានជ័យ ខណ្ឌមានជ័យ បានបាត់រថយន្តរបស់ខ្លួនមួយគ្រឿងម៉ាក CRV ខាងលើ កាលពីវេលាម៉ោង ២ និង៣០រំលងអាធ្រាត្រឈានចូលថ្ងៃទី ០៨ ខែមិថុនា ឆ្នាំ ២០១៦ នោះ។រហូតដល់វេលាម៉ោង ៣ និង ៤៥ នាទីល្ងាច ថ្ងៃទី ១៥ ខែមិថុនាឆ្នាំ២០១៦ ក៏បានប្រទះឃើញរថយន្តរបស់ខ្លួនដែលបានបាត់នោះនៅក្នុងយានដ្ឋានជួសជុលរថយន្តដែលមានយីហោ ហេង ហេង នៅម្តុំលូប្រាំ ក៏រាយការប្រាប់កម្លាំងនគរបាលប៉ុស្តិ៍ស្ទឹងមានជ័យឃាត់ទុក និងឈានទៅដល់ការឃាត់ខ្លួនបានក្រុមចោរលួចរថយន្តទាំងពីរនាក់ខាងលើតែម្តង។
ក្រោយពេលកម្លាំងមានសម្ថកិច្ចធ្វើការឃាត់ខ្លួនបានបក្សពួកក្រុមចោរលួចរថយន្តទាំងពីរនាក់ រួមទាំងវត្ថុតាងរួចហើយ ក៏បាននាំខ្លួនមកធ្វើការសាកសួរ និងកំណត់ហេតុបញ្ជូនខ្លួនទៅកាន់អធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការទៅតាមផ្លូវច្បាប់ជាបន្តទៅទៀត៕
