រាជធានីភ្នំពេញ៖កម្លាំងនគរបាលខណ្ឌទួលគោក សហការជាមួយកម្លាំងព្រហ្មទណ្ឌកម្រិតធ្ងន់ បានធ្វើការឃាត់ខ្លួនជនសង្ស័យម្នាក់ ដែលប្រើកាំបិតចាក់សម្លាប់ស្ត្រីយោធាបំរើការងារនៅក្រសួងការពារជាតិ កាលពីពេលថ្មីៗ នេះ ទាំងកណ្តាលចំណោមមនុស្សកុះករ ស្ថិតនៅខាងលិចផ្សារដេប៉ូ ។ តាមព័ត៌មានទទួលបាន គឺបន្ទាប់ពីកើតមានឃាតកម្មនោះ សមត្ថកិច្ចជំនាញមិនបាននៅស្ងៀមនោះឡើយ ហើយបានបើកការស្រាវជ្រាវ រហូតដល់កំណត់មុខសញ្ញាជនដៃដល់បាន កាលពីម៉ោង៣រសៀលថ្ងៃទី២២ មិថុនា ២០១៦ នេះ បន្ទាប់ពីមើលតាមកាមេរ៉ាសុវត្ថិភាពនៅជិតកន្លែងកើតហេតុ ហើយត្រូវកំណត់ភិនភាគបាន ។ ប៉ុន្តែមកដល់ពេលនេះ ជននោះសមត្ថកិច្ចនៅមិនទាន់បង្ហើបពីអត្តសញ្ញាណនោះទេ ហើយជនសង្ស័យក៏មិនទាន់សារភាពដែរ ។
បើទោះបីជាគេឃើញមានស្លាកស្នាមរបួសលើដៃពេលដែលប្រតាយប្រតប់គ្នា ហើយម៉ូតូជននោះជិះ គឺដូចក្នុងកាមេរ៉ាសុវត្ថិភាព ពេលដែលមកធ្វើសកម្មភាពចាក់សម្លាប់នារីនោះ ។ តាមព័ត៌មានដដែលបញ្ជាក់ថា មុខសញ្ញាខាងលើ គឺត្រូវគេដឹងទៀតថា មានទីលំនៅក្បែរផ្ទះរបស់នារីរងគ្រោះដែលស្លាប់នោះ ៕
