រាជធានីភ្នំពេញ៖ស្ត្រីម្នាក់ឈ្មោះ ប៉ាង ស៊ីណា អាយុ៣៥ឆ្នាំ រស់នៅភូមិថ្មី ឃុំត្រាង ស្រុកកំរៀង ខេត្តបាត់ដំបង ដែលសង្ស័យថា បានជេរប្រមាថសម្តេច ហ៊ុន សែន តាម Facebook ត្រូវបានតុលាការសម្រេចដោះលែង ឲ្យនៅក្រៅឃុំ ប៉ុន្តែស្ថិតនៅក្រោមការ អង្កេតរបស់តុលាការ ។
យ៉ាងណាក៏ដោយ ស្ត្រីរូបនោះត្រូវបានចោទពីបទ ពាក់ព័ន្ធការ “ប្រមាថ ប្រឆាំង អ្នករាជការសាធារណៈ” ដោយខាងអយ្យការ បានបញ្ជូនទៅឲ្យ ខាងចៅក្រមស៊ើបសួរ គឺលោកសម្រេចមិនឃុំខ្លួន ស្ត្រីសង្ស័យនោះទេ ដោយសម្រេចដាក់ឲ្យ នៅក្រោមការត្រួតពិនិត្យ តាមផ្លូវតុលាការ ដោយកំណត់ឲ្យ ចូលខ្លួនទៅបង្ហាញមុខ មួយខែម្តងនៅប៉ុស្តិ៍នគរបាល រដ្ឋបាល ដែលស្ថិតនៅក្នុងមូលដ្ឋាន ដែលខ្លួនរស់នៅ។
ប៉ុន្តែស្ត្រីរូបនោះ បានបដិសេធថា មិនបានជេរប្រមាថ សម្តេច ហ៊ុន សែន នោះទេ ប៉ុន្តែមានជនខិលខូច បានយកទូរស័ព្ទរបស់ខ្លួន ទៅប្រើប្រាស់ហើយ បានយកអាខោន Facebook នាងឈ្មោះ ស៊ីណា នាគមាស ទៅជេរប្រមាថសម្តេច ព្រោះថា ទូរស័ព្ទរបស់នាង បានជ្រុះបាត់ ក្នុងអំឡុងថ្ងៃទី១២ ខែឧសភា ឆ្នាំ២០១៦ នេះ ។
ស្ត្រីរូបនោះអះអាងថា បន្ទាប់ពីបានឃើញ អាខោន Facebook ខ្លួនត្រូវបានគេប្រើប្រាស់ យកទៅជេប្រមាថ សម្តេចតេជោសែន នៅថ្ងៃទី២០ ខែឧសភា ឆ្នាំ២០១៦ នាងក៏បានទៅដាក់ពាក្យ ប្តឹងនៅនគរបាល ប៉ុស្ថិ៍ត្រាង អំពីរឿងអាខោន Facebook នាង ឈ្មោះ ស៊ីណា នាគមាស ត្រូវគេ យកទៅប្រើប្រាស់ ជេរប្រមាថសម្តេច។
គួរបញ្ជាក់ថា កាលពីល្ងាចថ្ងៃទី២៥ ខែមិថុនា ឆ្នាំ២០១៦ កំលាំងកងរាជអាវុធហត្ថខេត្តបាត់ដំបងបានបញ្ជូនស្ត្រីខាងលើមកកាន់តុលាកាដើម្បីសាកសួរជុំវិញបញ្ហាការជេរប្រមាថសម្តេច ហ៊ុន សែនតាមប្រពន្ធ័ពត៌មានសង្គមហ្វេសប៊ុក៕
