ដោយ៖ប្រុញ វិធិន
ខេត្តក្រចេះ៖នាយសង្កាត់រដ្ឋបាលព្រៃឈើស្រុកឆ្លូង លោក ផូង ឃុនឡាយ ដឹកនាំកម្លាំងចម្រុះ ចុះបង្ក្រាបចាប់ឃាត់រថយន្តកែច្នៃ ដឹកឈើមួយគ្រឿង នៅចំណុចក្បែរវត្តសំរោងអណ្តែត ឃុំខ្សាច់អណ្តែត ស្រុកឆ្លូង កាលពីព្រឹកថ្ងៃទី២៨ ខែមិថុនា ឆ្នាំ២០១៦។
កម្លាំងសមត្ថកិច្ចចម្រុះ រួមមាន កម្លាំងរដ្ឋបាលព្រៃឈើឆ្លូង សហការជាមួយខណ្ឌរដ្ឋបាលព្រៃឈើក្រចេះ និងកម្លាំប្រដាប់អាវុធស្រុកឆ្លូង បានបើកប្រតិបត្តិការបង្ក្រាបរថយន្តកែច្នៃដឹកឈើខុសច្បាប់មួយគ្រឿង ដែលមានលក្ខណៈដូចទៅនឹងរថយន្តយីឌុប បន្ទាប់ពីទទួលបានពត៌មានរាយកាណ៍អំពីសកម្មភាពបទល្មើសព្រៃឈើ។
លោកនាយសង្កាត់រដ្ឋបាលព្រែឈើឆ្លូង បានឲ្យដឹងថា កម្លាំងរបស់លោកសហការជាមួយកម្លាំងចម្រុះ ទើបឃាត់បានរថយន្ដកែច្នៃដឹកឈើខុសច្បាប់នោះ ហើយក្រោយពីសមត្ថកិច្ចចម្រុះឃាត់រថយន្ដនោះ អ្នកបើកបររថយន្ដ និងអ្នកជិះបីបួននាក់ បាននាំគ្នារត់បាត់ស្រមោល មិនស្គាល់អត្តសញ្ញាណម្ចាស់ឈើនោះទេ។
មន្ត្រីរដ្ឋបាលព្រៃឈើឆ្លូង បន្តទៀតថា ឈើទាំងនោះជាប្រភេទឈើក្រហម ឈើអាលេខ២ហើយត្រូវកម្លាំងរដ្ឋបាលព្រៃឈើនាំយកមករក្សាទុកនៅសង្កាត់រដ្ឋបាលព្រៃឈើឆ្លូង ដើម្បីធ្វើការវាស់វែង និងកសាងសំណុំរឿងដើម្បីចាត់ការតាមនីតិវិធីច្បាប់៕
