រាជធានីភ្នំពេញ៖ស្ត្រីវ័យកណ្តាលម្នាក់ស្រវឹងជោកបើករថយន្តឡិចស៊ីស RX300 មួយគ្រឿង ទៅបុកបង្គោលភ្លើងមួយដើមបាក់រាបដល់ដី និងរថយន្តខូចខាតធ្ងន់ តែមិនបណ្តាលឲ្យស្ត្រីរូបនោះរងរបួសធ្ងន់ធ្ងរទេ។ ហេតុការណ៍នេះកើតឡើងត្រង់មុខក្រុមហ៊ុនលក់រថយន្តម៉ាក Range Rover តាមបណ្តោយមហាវិថីសហព័ន្ធរុស្ស៉ី ស្ថិតក្នុងសង្កាត់ទឹកថ្លា ខណ្ឌសែនសុខ។
ប្រភពព័ត៌មាន ឲ្យដឹងថា មុនមានករណីគ្រោះថ្នាក់ចរាចរណ៍ ដែលបើករថយន្តបុកបង្គោលភ្លើងនេះបានកើតឡើង គេបានឃើញស្ត្រីវ័យកណ្តាលខាងលើ ដែលមានអាការៈស្រវឹងឈរទប់ខ្លួនស្ទើរមិនជាប់នោះបើករថយន្តឡិចស៊ីស RX300 ពណ៌ខ្មៅ ពាក់ស្លាកលេខភ្នំពេញ 2Z-9456 តាមមហាវិថីសហព័ន្ធរុស្ស៉ី យ៉ាងលឿនក្នុងទិសដៅពីលិចទៅកើត តែម្នាក់ឯង។ ខណៈមកដល់ចំណុចកើតហេតុក៏រេចង្កូតឡើងលើចិញ្ចើមផ្លូវ បុករះគល់ឈើ និងបន្តទៅបុកផ្ទប់បង្គោលភ្លើង ដែលដាក់បំភ្លឺតាមផ្លូវបណ្តាលឲ្យបាក់រាបដល់ដី និងធ្វើឲ្យបង្គោលភ្លើងនោះវាត់ទៅត្រូវ រថយន្តផ្នែកខាងមុខត្រង់អ្នកបើកបរ បណ្តាលឲ្យខូចខាតធ្ងន់ តែសំណាងល្អមិនត្រូវចំស្ត្រីបើកបររូបនោះទេ។
ក្រោយកើតហេតុរថយន្តត្រូវបាន ខាងនគរបាលចរាចរណ៍ក្រុង ស្ទូចយកទៅរក្សាទុកដើម្បីដោះស្រាយនៅពេលក្រោយ៕
