ខេត្តក្រចេះ៖ក្រុមចោរចំនួន៧នាក់ប្រដាប់ដោយអាវុធខ្លីគ្រប់ដៃ និងកាំភ្លើងវែងមួយដើមបានធ្វើសកម្មភាពចូលភ្ជង់ និងវាយ ម្ចាស់ផ្ទះបណ្តាលឲ្យរងរបួសប្លន់យកទ្រព្យសម្បត្តិមួយចំនួន។ ករណីនេះកើតឡើងនៅវេលាម៉ោង២០និង៣០នាទី ថ្ងៃទី២៤ ខែកក្កដា ឆ្នាំ២០១៦ ស្ថិតនៅភូមិត្រពាំងស្រែ ឃុំ២ធ្នូ ស្រុកស្នួលខេត្តក្រចេះ។
អាវុធហត្តស្រុកស្នួលបានឲ្យដឹងថា ម្ចាស់ផ្ទះរងគ្រោះឈ្មោះ សួង ហុង ភេទស្រី អាយុ៤៦ឆ្នាំ ត្រូវក្រុមចោរវាយ និងអាវុធខ្លីត្រូវចំសៀតផ្កាខាងឆ្វេងរងរបួស ហើយក្រុមចោរទាំងនោះបានយកអាវចងកូនប្រុស ជនរងគ្រោះឈ្មោះ តាំង វ៉ាន់ធី អាយុ១៦ឆ្នាំ។ ខណៈដែលពួកចោរ កំពុងធ្វើសកម្មភាពប្លន់ ប្ដីជនរងគ្រោះឈ្មោះ តាំង ម៉ានី អាយុ៤១ឆ្នាំ បានជិះម៉ូតូមកដល់ផ្ទះត្រូវបានក្រុមចោរបាញ់១គ្រាប់ តែខុសហើយជនរងគ្រោះបានរត់រួច។
តាមប្រភពដដែលបញ្ជាក់ថា ទ្រព្យសម្បត្តិដែលក្រុមយកបានមានខ្សែដៃមាសចំនួន២តំឡឹង ក្រវិលផ្លាកទីន១ជី ចិញ្ជៀនផ្លាកទីន១ជីទូរសព្វ័ដៃ ចំនួន៣គ្រឿង និងលុយមួយចំនួនទៀត។ ក្រោយធ្វើសកម្មភាពប្លន់រួចរត់គេចខ្លួនដោយផ្លោះតាមរបងផ្ទះខាងក្រោយចេញទៅបាត់៕
