ភ្នំពេញ៖ លោកម៉ម សូណង់ដូ បានរិះគន់ធ្ងន់ៗថា លោកសម រង្ស៊ី និងលោកកឹម សុខា ជាជនបោកប្រាស់ និងបានប្រៀបធៀបទៅនឹងសត្វបង្គួយដែលជាប្រភេទសត្វឡេមឡឺមៗរួចហើយរត់បាត់។
ការរិះគន់ពីសំណាក់លោកម៉ម សូណង់ដូ ទៅកាន់មេដឹកនាំបក្សសង្គ្រោះជាតិនេះ បានធ្វើឡើងនៅក្នុងពេលជួបសំណេះ សំណាលជាមួយប្រជាពលរដ្ឋនៅក្នុងស្រុកស្អាង ខេត្តកណ្តាលកាលពីថ្ងៃទី២៧ សីហា និងបានយកមកបញ្ជាក់បន្ថែមដល់វិទ្យុវាយោនៅថ្ងៃទី២ ខែកញ្ញា នេះ។
លោកម៉ម សូណង់ដូ ក៏បានលើកឡើងពាក្យមួយឃ្លាថា ដូរមិនដូរ…ដូរ ដល់ពេលគេមិនដូរ ដូរខ្លួនឯង ឬនៅពេលលោកធំគេគោះតុ ពួកបក្សប្រឆាំងនាំគ្នារត់ចូលក្រោមតុអស់ហើយ។ នេះជាចរិករបស់ថ្នាក់ដឹកនាំគណបក្សសង្គ្រោះជាតិ។
គួររំលឹកថា លោកម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ និងជាអ្នកគាំទ្រគណបក្សសង្គ្រោះជាតិមួយរូបផងដែរនោះ បានថ្លែងរិះគន់យ៉ាងចាស់ដៃទៅកាន់ថ្នាក់ដឹកនាំគណបក្សសង្គ្រោះជាតិលោកសម រង្ស៊ី និងលោកកឹម សុខា បន្ទាប់ពីមេដឹកនាំបក្សប្រឆាំងនេះបានសម្រេចចិត្តចូលសភាកាលពីពេលថ្មីៗកន្លងទៅនេះ៕
