ខេតបាត់ដំបង៖ប្រភពពត៌មាននៅជុំវិញកន្លែងកើតហេតុបានអោយដឹងថា មុនពេលកើតហេតុវេលាម៉ោង៧.៣០នាទី ថ្ងៃទី២៣ ខែសីហា ឆ្នាំ២០១៦ នាចំនុចផ្សារថ្មី ក្នុងក្រុងបាត់ដំបង ខេត្តបាត់ដំបង មានស្ត្រីវ័យជាង៣០ឆ្នាំម្នាក់បានមកសួរនាំនិងទិញត្រីងៀត ត្រីឆ្អើរ ពងត្រី ត្រីប្រម៉ាជាដើមដែលមានទាំងអស់ចំនួន៧មុខ ក្នុង១មុខទិញចំនួនកន្លះគីឡូក្រាម ខណៈជនរងគ្រោះរវល់មមាញឹកថ្លឹងត្រីនៅចំហៀងខាងស្តាំដៃ ភ្លេចនឹកឃើញកាបូបលុយដែលដាក់នៅខាងមុខខ្លួនជាហេតុធ្វើអោយជនដៃដល់មានឱកាសលួចយកតែម្តង។
ស្ត្រីជនរងគ្រោះមានឈ្មោះណក់ ភឿន អាយុ៤៥ឆ្នាំ រស់នៅភូមិអូរខ្ជាយ សង្កាត់ព្រែកព្រះស្តេច ក្រុងនិងខេត្តបាត់ដំបងបានរៀបរាប់ទាំងទឹកភ្នែកថា លោកស្រីកន្លងមកមិនដែលដាក់លុយតាមខ្លួនច្រើនដូចពេលនេះឡើយ ជាលុយសម្រាប់ទូរទាត់អោយថ្លៃត្រីទាំងអស់ចំនួន៣ ៦០០ ០០០លានរៀល ក្រវឹលមាស១គូរនិងខ្សែដៃប្លាកទីន១ខ្សែទម្ងន់៤ជីទៀតដែលលោកស្រីបានដាក់ក្នុងកាបូបបន្ទាប់ពីជិះម៉ូតូដួលពីល្ងាចហើយបានដាច់ខ្សែដៃនោះ។
លោកស្រីបន្តថា ខណះពេលដែលគាត់កំពុងរវល់ថ្លឹងត្រីយ៉ាងញាប់ដៃ ជនដៃដល់បានដើរចេញទៅបន្ទាប់ពីលួចលុយបានសម្រេច មិនយូរប៉ុន្មានរយះពេលប្រមាណជិត៥នាទីទើបគាត់លូកយកទូរសព្ទ័ដៃដែលដាក់ក្នុងកាបូបធំមកនិយាយស្រាប់តែបាត់មិនឃើញកាបូបតូចដែលដាក់លុយ ទើបមានការភ្ញាក់ផ្អើលឡើងតែម្តង។
នគរបាលការពារសន្តិសុខក្នុងផ្សារបានអោយដឹងថា ក្នុងរយះពេលកន្លះខែមកនេះក្នុងផ្សារមានករណីស្រដៀងគ្នាចំនួន៣លើកដែលជនដៃដល់បានធ្វើសកម្មភាពបានសម្រេចចន្លោះពេលដែលកម្លាំងដើរល្បាត៕
