រាជធានីភ្នំពេញ៖នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ បានបញ្ជាក់ប្រាប់អ្នកសារព័ត៌មាននៅព្រឹកថ្ងៃទី២៥ ខែសីហា ឆ្នាំ២០១៦នេះថា ជនដៃដល់ដែលជាម្ចាស់ហាង «រតន:រចនាម៉ូដ»ហើយបានប្រើហិង្សាវាយទៅលើតារត់ម៉ូតូកង់រហូតបាក់ដៃនោះត្រូវបានសមត្ថកិច្ចនគរបាល ចាប់ខ្លួនបានហើយ នៅរសៀលថ្ងៃទី២៤ ខែសីហា ឆ្នាំ២០១៦ ហើយនៅព្រឹកថ្ងៃទី២៥ ខែសីហានេះ សមត្ថកិច្ចនគរបាល នឹងនាំខ្លួនម្ចាស់ហាង «រតនៈរចនាម៉ូដ» ទៅធ្វើតម្រាប់ពីសកម្មភាពដែលបានវាយតាម៉ូតូកង់បីម្នាក់រហូតបាក់ដៃ គ្រាន់តែចតម៉ូតូមុខហាងរង់ចាំម៉ូយនោះ។
ជនល្មើសត្រូវបានគេស្គាល់ឈ្មោះ ពៅ រតនៈ ហៅប្រុស អាយុ៣៦ឆ្នាំ ស្នាក់នៅផ្ទះលេខ៦៣៨F ផ្លូវ២៧១ សង្កាត់ផ្សារដើមថ្កូវ ខណ្ឌចំការមន។ នៅចំពោះមុខសមត្ថកិច្ច ជននេះបានសារភាពថា ខ្លួនពិតជាបានវាយជនរងគ្រោះរហូតបាក់ដៃមែន ក្រោយឈ្លោះគ្នារឿងចតម៉ូតូកង់បីមុខហាង កាលពីម៉ោង១០៖៥០នាទីយប់ ថ្ងៃទី២៣ ខែសីហា ឆ្នាំ២០១៦ ។
ប៉ុន្តែបុរសរងគ្រោះ បានរៀបរាប់ថា មុនកើតហេតុគាត់បានឈប់មុខផ្ទះខាងលើ ដើម្បីរងចាំឌុបម៉ូយ លុះឈប់បានបន្តិចក៏មានបុរសម្នាក់បើកឡានមួយគ្រឿង មិនស្គាល់ម៉ាកមកដល់ហើយបានប្រាប់ឲ្យគាត់យកកង់បីចេញពីមុខផ្ទះភ្លាមៗ គាត់រៀបនឹងបណ្តើរកង់បី ចេញហើយតែបណ្តើរមិនទាន់ផង ក៏បុរសជាម្ចាស់ផ្ទះរូបនោះ បានបើកទ្វារផ្ទះរួចយកឈើជ្រុង វាយគាត់បណ្តាលឲ្យបាក់ដៃឆ្វេងតែម្តង។
ជនរងគ្រោះបន្តថា ក្រោយពីវាយបុរសចំណាស់ជាអ្នករត់កង់បីបណ្តាលឲ្យបាក់ដៃ ជនដៃដល់ជាម្ចាស់ផ្ទះបានបើកឡានចេញ ទៅបាត់ដោយទុកឲ្យម្ចាស់កង់បីដេកដួលនឹងឈឺចាប់ជាខ្លាំង ។ ភ្លាមៗនោះអ្នកដែលរស់នៅក្បែនោះអាណិតបានហៅឡានពេទ្យមកដឹកយកទៅព្យាបាល នៅមន្ទីពេទ្យ ផងដែរ ៕
