ដោយ៖ប៉ែនសុផល
បាត់ដំបង៖លោកស្រីសុខុនមេបញ្ជាការនគរបាលព្រុំដែនវរៈសេនាតូចលេខ៨១៧នៅថ្ងៃទី២៤ ខែសីហា បាននាំកម្លាំងក្នុងអង្គភាពចំនួន១២នាក់ចុះសួរសុខទុក្ខដល់ក្រុមគ្រួសាររបស់លោក រស់ ជាតប៊ី ជាមន្ត្រីបំរើការក្នុងអង្គភាព៨១៧ផ្នែកវិទ្យុទាក់ទងដែលកំពុងមានជំងឺសម្រាកព្យាបាលនៅគេហដ្ឋានឋិតក្នុងភូមិកូនភ្នំខាងជើង ឃុំតាស្តា ស្រុកសំពៅលូន ខេត្តបាត់ដំបង។
លោក ស្រី សុខុម បានបញ្ជាក់ថា ក្នុងនាមយើងជាគ្រួសារតែមួយបំរើជាតិការពារប្រជាពលរដ្ឋ និងរាជរដ្ឋាភិបាលដូចគ្នាត្រូវតែចេះយកចិត្តទុកដាក់ចំពោះគ្នាទៅវិញទៅមក ដែលជាកម្លាំងចិត្តដល់ក្រុមគ្រួសារដែលបានលះបង់កម្លាំងកាយចិត្តបំរើជាតិមាតុភូមិ។ លោកបន្តថា មនុស្សម្នាក់ៗចៀសមិនផុតពីជំងឺឈឺស្លាប់នោះទេ គ្រាន់តែពេលវេលាយួរ ឬឆាប់ប៉ុណ្ណោះ។
ក្នុងការចុះសួរសុខទុក្ខនោះដែរលោកក៏បានជួយឧបត្ថមថវិកាចំនួន១.៥៤.០០០០រៀល(មួយលានហាសិបបួនម៉ឺនរៀល)ដើម្បីព្យាបាលបន្ត និងជួយកាត់បន្ថយនូវការខ្វះខាតក្នុងគ្រួសារបានមួយកំរិតដែរ។
ជាមួយគ្នានេះលោក រស់ ជាតប៊ី បានថ្លែងអំណរគុណចំពោះសណ្តានចិត្តដ៏ជ្រះថ្លារបស់លោកមេបញ្ជាការព្រមទាំងបងប្អូនរួមការងារទាំងអស់ដែលបានយកចិត្តទុកដាក់ចំពោះគ្រួសារលោក ហើយលោកខិតខំព្យាលបាលឲ្យឆាប់បានជាសះស្បើយ និងបានចូលរួមបំរើជាតិ និងរាជរដ្ឋាភិបាលវិញក្នុងពេលឆាប់ៗនេះ៕
