នេប៉ាល់៖សារព័ត៌មានរដ្ឋនេប៉ាល់ចេញផ្សាយនាព្រឹកនេះថា រថយន្តមួយគ្រឿងបានបើកជ្រុលចង្កូតធ្លាក់ចូលក្នុងទន្លេ Trishuli ក្នុងស្រុក Chitwan បណ្តាលឲ្យមនុស្ស២០នាក់បានស្លាប់ និង១៧នាក់ទៀតរងរបួស។
អធិការប៉ូលិសស្រុក Chitwan លោក Basanta Kunwar បានឲ្យដឹងថា រថយន្តក្រុងខាងលើនេះ បានដឹកមនុស្ស ៣៩នាក់ (តៃកុងម្នាក់ និងព្រូម្នាក់) ធ្វើដំណើរនៅតាមដងផ្លូវដ៏មមាញឹកបំផុតមួយក្នុងខេត្ត ហើយទំនង ជាបានជ្រុលបង្កូត ទើបធ្លាក់ចូលទៅក្នុងទន្លេតែម្តងនៅវេលាម៉ោង ៤៖៤៥នាទីព្រឹកថ្ងៃសុក្រនេះ ម៉ោងនៅទីក្រុងកាត្មាន់ឌូ។
គួរបញ្ជាក់ថា អ្នកស្លាប់ត្រូវបានក្រុមសង្គ្រោះស្រង់ចេញពីក្នុងទន្លេជាបណ្តើរៗ ហើយដោយឡែកអ្នករងរបួសធ្ងន់និង ស្រាល ១៧នាក់ត្រូវបានបញ្ជូនទៅធ្វើការសង្គ្រោះ នៅឯមន្ទីរពេទ្យក្នុងស្រុក Bharatpur ដែលនៅក្បែរនោះ។ សម្រាប់ អ្នកបាត់ខ្លួនពីរនាក់ គឺតៃកុងឡាន និងព្រូ ពេលនេះអាជ្ញាធរកំពុងបន្តធ្វើការស្វែងរកក្នុងទន្លេ៕
