រាជធានីភ្នំពេញ៖ក្រុមមេធាវីការពារក្តី លោក កឹម សុខា ប្រធានស្តីទីគណបក្សសង្គ្រោះជាតិ ប្តឹងទៅសាលាឧទ្ធរណ៍ ករណីចៅក្រមស៊ើបសួរនៃសាលាដំបូង រាជធានីភ្នំពេញ សម្រេចបញ្ជូនសំណុំរឿង លោក កឹម សុខា ទៅជំនុំជម្រះ ដែលការសម្រេចនោះធ្វើឲ្យប៉ះពាល់សិទ្ធិនិងផលប្រយោជន៍របស់កូនក្តីយ៉ាងធ្ងន់ធ្ងរ។
សូមរំលឹកថា ចៅក្រមសាលាដំបូង រាជធានីភ្នំពេញ លោក ថាន់ ឡេង នៅថ្ងៃទី២៣ ខែសីហាបាន សម្រេចបញ្ជូនសំណុំរឿង លោក កឹម សុខា អនុប្រធានគណបក្ស សង្គ្រោះជាតិ ដែលរងបទចោទ ប្រកាន់ បដិសេធក្នុងការចូលខ្លួន ទៅជំនុំជម្រះ។ យោងតាមខ្លឹមសារ លិខិតជូនដំណឹង របស់លោកចៅក្រម ថាន់ ឡេង ចុះថ្ងៃទី២៣ សីហា គឺបាន ប្រាប់មកជន ត្រូវចោទឈ្មោះ កឹម សុខា ភេទប្រុស អាយុ៦៣ឆ្នាំ ជនជាតិខ្មែរ មុខរបរ តំណាង រាស្ត្រមណ្ឌល ខេត្តកំពង់ចាម ថា ត្បិតសំណុំរឿងព្រហ្មទណ្ឌលេខ២៤០១ ចុះថ្ងៃទី២៦ ខែ ឧសភា ឆ្នាំ២០១៦ ដែលបានចោទប្រកាន់តាមដីកាស ន្និដ្ឋានបញ្ជូនរឿងឲ្យស៊ើបសួរលេខ ១៣៨២ អ.យ.ឋ ចុះថ្ងៃទី២៦ ខែឧសភា ឆ្នាំ២០១៦របស់អយ្យការ អមសាលាដំបូងរាជធានីភ្នំពេញ ពីបទ បដិសេធក្នុងការចូលខ្លួន ប្រព្រឹត្តិនៅរាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០១៦ តាម បញ្ញត្តិមាត្រា៥៣៨ នៃក្រមព្រហ្មទណ្ឌ យើងបានចាត់ការស៊ើប សួរចប់សព្វគ្រប់ និងបានសម្រេច បញ្ជូនសំណុំរឿងនេះទៅជំនុំជម្រះតាម ដីកាដំណោះស្រាយលេខ២៨៩១ ក១.ដ.ដ ចុះថ្ងៃទី២៣ ខែសីហា ឆ្នាំ២០១៦ ៕
