ដោយ៖ប្រុញ វិធិន
ខេត្តក្រចេះ៖អ្នកនេសាទម្នាក់ ត្រូវខ្មាន់កាំភ្លើងមិនស្គាល់មុខបាញ់ឲ្យរងរបួសធ្ងន់ត្រង់ត្រគៀគ ខណៈដែលជនរងគ្រោះកំពុងនេសាទត្រីនៅតាមដងទន្លេ ក្នុងស្រុកសំបូរ។ ករណីផ្ទុះអាវុធនេះកើតឡើងនៅវេលាម៉ោង១១ និង៣០ថ្ងៃត្រង់ទី២៦ ខែសីហា ឆ្នាំ២០១៦ ម្សិលមិញនេះ នៅកណ្ដាលទន្លេចំនុចអន្លង់ត្រឡោក ស្ថិតក្នុងភូមិពន្ធតាជា ឃុំអូរគ្រៀង ស្រុកសំបូរ ខេត្តច្រេះ ។
ជនរងគ្រោះឈ្មោះ ឃឹម សុខខន ភេទប្រុស អាយុ២៤ឆ្នាំ រស់នៅភូមិកំពង់រទេះ ឃុំបឹងចារ ស្រុកសំបូរ ខេត្តក្រចេះ ។
ជនរងគ្រោះបានរៀបរាប់ប្រាប់អោយដឹងថា នៅមុនពេលកើតហេតុ ជនរងគ្រោះបានទៅលើកលបមានគ្នាចំនួនពីនាក់ ពេលលើកលបហើយ ជនរងគ្រោះក៏បានបើកទូកត្រឡប់មកវិញ លុះដល់ចំណុចកើតហេតុ ក៏មានទូកមួយទៀត បើកទូកមកទន្ទឹមនឹងទូករបស់ជនរងគ្រោះ ដោយមានគ្នាពីរដែរ និងមានចំងាយពីគ្នាប្រហែលពី៣០ ទៅ៤០ម៉ែត្រ តែមិនស្គាល់មុខអ្នកទាំងនោះទេ។ ប្រភពបន្តថា ពេលកំពុងបើកទូកស្រាប់តែទូកម្ខាងទៀតអ្នកអង្គុយចំកណ្ដាលទូកលើកកាំភ្លើងអាការស្វាយបទបាញ់រះមកលើទូករបស់ជនរងគ្រោះចំនួន៧គ្រាប់ បណ្ដាលអោយត្រូវចំត្រគៀគ ហើយជនរងគ្រោះក៏បានឈប់ទូកដេកក្នុងទូក។ ចំណែកឯអ្នករួមដំណើរជាមួយគាត់ពេលឃើញដូចនោះ ក៏បើកទូកដឹកគាត់យកមកភូមិ ដើម្បីបញ្ជូនទៅព្យាបាល រីឯទូកម្ខាងទៀតជាខ្មាន់កាំភ្លើង បានបើកទូកត្រឡប់ឡើងលើវិញ គឺសំដៅទៅភូមិពន្ធតាជា។
ពាក់ព័ន្ធជុំវិញករណីផ្ទុះអាវុធនេះ លោក ណយ ស៊ីថាច អធិការងស្រុកសំបូរ ទទួលការងារព្រហ្មទណ្ឌ បានឲ្យដឹងនៅព្រឹកថ្ងៃទី២៧នេះថា លោកកំពុងនាំកំលាំងនៅកណ្ដាលទន្លេ ដើម្បីស៊ើបអង្កេត តែមិនទាន់មានតំរុយនៅឡើយទេ ហើយកំពុងស្រាវជ្រាវ ដើម្បីចាប់ខ្លួនជនល្មើសយកមកផ្តន្ទាទោសតាមច្បាប់ ។
បច្ចុប្បន្នជនរងគ្រោះ កំពុងសំរាកព្យាបាលនៅមន្ទីរពេទ្យបង្អែកខេត្តក្រចេះ៕
