រាជធានីភ្នំពេញ៖បើទោះជាការដង្ហែក្បួនដាក់ញត្តិរបស់ គណបក្សយុវជនកម្ពុជា ដឹកនាំដោយ លោក ពេជ្រ ស្រស់ បានរំសាយហើយក៏ដោយ ប៉ុន្តែប្រធានគណបក្សយុវជន បានព្រមានថា បើសិនមិនមានការឆ្លើយតប ពីស្ថានទូតវៀតណាមក្នុងរយៈពេលមួយខែទេនោះ លោកនឹងគៀកគរ កម្លាំងអ្នកស្នេហាជាតិ ធ្វើបាតុកម្ម ប្រឆាំងនឹងស្ថានទូតវៀតណាម ដោយលោករំពឹងថា បាតុកម្មនោះនឹងមានអ្នកចូលរួមច្រើន ។
គួរម្លឹកថា នៅព្រឹកថ្ងៃច័ន្ទនេះ លោក ពេជ្រ ស្រស់ បានយកញ្ញាត្តិទៅដាក់នៅស្ថានទូតវៀតណាម ប្រចាំរាជធានីភ្នំពេញ ដោយទាមទារឲ្យវៀតណាមបំភ្លឺករណីដែលប្រទេសនេះ បានរំលោភលើព្រំដែនកម្ពុជា ។ ប៉ុន្តែពុំមានមន្ត្រីស្ថានទូតចេញមកទទួលនោះទេ, ផ្ទុយទៅវិញមានអភិបាលរងខ័ណ្ឌចំកាមនម្នាក់ ចេញមុខមកទទួលញាត្តិនោះទៅវិញ។
លោក ពេជ្រ ស្រស់ បានចាត់ទុក ការមិនចេញមុខមកទទួលញត្តិពីសំណាក់ស្ថានទូតវៀតណាម គឺជាការប្រមាថ និងមើលងាយដល់ គណបក្សយុវជន ក៏ដូចជាប្រជាពលរដ្ឋខ្មែរ ។ ដូច្នេះហើយលោកនឹងធ្វើបាតុកម្មប្រឆាំងវៀតណាម ប្រសិនបើពុំមានការបំភ្លឺណាមួយពីស្ថានទូតនោះ ។
គួរបញ្ជាក់ថា ក្នុងញត្តិនោះ មានការទាមទារ៣ចំណុច រួមមាន៖ ទី១. រដ្ឋាភិបាលវៀតណាម ត្រូវចេញសេចក្តីថ្លែងការណ៍មួយជាសាធារណៈ ដើម្បីបញ្ជាក់គោលជំហរខ្លួនឱ្យច្បាស់លាស់ ក្នុងការបញ្ឈប់សកម្មភាពរំលោភ បូរណភាពទឹកដីកម្ពុជា។ ទី២. រដ្ឋាភិបាលវៀតណាម ត្រូវតែរុះរើគ្រប់សំណង់ទាំងឡាយណា ដែលបានសាងសង់នៅតំបន់ហាមឃាត់តាមព្រំដែនកម្ពុជា – វៀតណាម គ្រប់កន្លែង និងលុបស្រះដោយ គ្មានលក្ខខណ្ឌ ទី៣. រដ្ឋាភិបាលប្រទេសវៀតណាម ត្រូវបញ្ឈប់បន្ទាន់ចំពោះសកម្មភាព ប្រើហិង្សាលើប្រជាពលរដ្ឋខ្មែរដែលរស់នៅ តាមបណ្តោយព្រំដែនកម្ពុជា-វៀតណាម ៕
