រាជធានីភ្នំពេញ៖តុលាការនៃរដ្ឋកាលីហ្វញ៉ា សហរដ្ឋអាមេរិក បានសម្រេចច្រានចោលការស្នើសុំរបស់មេធាវីលោក មាជ សុវណ្ណរ៉ា ដែលបានស្នើសុំឲ្យធ្វើការសាកសួរផ្ទាល់មាត់ ចំពោះលោក ហ៊ុន ម៉ាណែត ទាក់ទងបណ្តឹងរបស់លោក មាជ សុវណ្ណរ៉ា សកម្មជនគណបក្សសង្គ្រោះជាតិ ដែលប្តឹងពីបទធ្វើទារុណកម្មតាមរយះការឃុំខ្លួន ដោយរំលោភបំពានក្រៅច្បាប់ និងមានរយះពេលយូរ ។
លោកមេធាវី Christopher Beres ដែលការពារក្តីឲ្យលោក ហ៊ុន ម៉ាណែត បានផ្តល់បទសម្ភាសន៍ដល់អ្នកសារព័ត៌មាន ដោយបញ្ជាក់ថា ករណីបណ្តឹងរដ្ឋប្បវេណីនៅតុលាការរដ្ឋកាលីហ្វញ៉ា សហរដ្ឋអាមេរិក ប្រឆាំងនឹងលោក ហ៊ុន ម៉ាណែត ដែលជាកូនប្រុសច្បងរបស់លោកនាយករដ្ឋមន្ត្រី ហ៊ុន សែន នោះគឺតុលាការសម្រេច កាលពីថ្ងៃព្រហស្បតិ៍សប្ដាហ៍មុន ហើយដោយសម្រេចច្រានចោលការស្នើសុំរបស់មេធាវីដើមបណ្តឹង ដែលស្នើសុំសាកសួរផ្ទាល់មាត់លោកហ៊ុន ម៉ាណែត ។ ទន្ទឹមនោះ ចៅក្រមក៏បានយល់ព្រមទទួលយកសំណើរបស់លោកហ៊ុនម៉ាណែតដើម្បីសាកសួរផ្ទាល់មាត់លើលោក Paul Hayes ដែលជាសាក្សីតែម្នាក់គត់ប្រឆាំងនឹងលោក ម៉ាណែត។ លោកថា ការសម្រេចបែបនេះគឺជាការត្រឹមត្រូវពីព្រោះថា ភ្នាក់ងារបញ្ជូលសារនេះហើយ ដែលបានអះអាងថាគាត់ត្រូវបានវាយប្រហារពីក្រោយខ្នងដោយបុរសម្នាក់ពាក់សំលៀកបំពាក់ពណ៌ខ្មៅ ហើយលោក Hayes បាន សន្មត់ថាការវាយប្រហារនោះធ្វើឡើងដោយអង្គរក្សរបស់លោក ហ៊ុន ម៉ាណែត ។
លោកមេធាវី Beres បានលើកឡើងថា ប្រហែលជាចៅក្រមមានហេតុផលច្រើនក្នុងការសម្រេចមិនឱ្យ ធ្វើការ សាកសួរផ្ទាល់មាត់លើលោក ហ៊ុន ម៉ាណែត ។ កត្តាមួយគឺថា មេធាវីរបស់ដើម បណ្តឹងបានបង្ហាញថាលោកចង់ចោទសួរទៅលោក ហ៊ុន ម៉ាណែតលើបញ្ហាជាច្រើនដែល មិនពាក់ព័ន្ទអ្វីទាល់តែសោះទៅនឹងបណ្តឹងដែលបានដាក់ទៅតុលាការ ហើយក្នុងនោះក៏មានសំណួរមួយចំនួនអាចនឹងពាក់ព័ន្ធព័ត៌មានសម្ងាត់របស់រដ្ឋាភិបាលកម្ពុជាផងដែរ។
លោកមេធាវី Beres បានបញ្ជាក់ថា ចៅក្រមប្រហែលចង់ផ្ញើសារទៅមេធាវីរបស់ដើមបណ្តឹងថា គួតែផ្តោតសំខាន់ ទៅលើ តែបញ្ហា ដែលពាក់ព័ន្ធនឹងបណ្តឹងនៅតុលាការនេះបានហើយ ។ លោកបន្តថា ចៅក្រមប្រហែលជាចង់ផ្តល់សញ្ញា ថាតុលាការនឹងមិនអនុញ្ញាតឱ្យដើមបណ្តឹងនិងមេធាវីប្រើប្រាស់ប្រព័ន្ធច្បាប់របស់សហរដ្ឋអាមេរិកដើម្បីវាយប្រហាររដ្ឋាភិបាលកម្ពុជានោះឡើយ។ ហើយបើតាមគំនិតរបស់លោក នេះគឺជាហេតុផលតែមួយគត់ដែលនៅពីក្រោយពាក្យបណ្តឹងនេះ ។
លោកមេធាវី Beres បានបញ្ជាក់ឡើងវិញថា ខណៈពេលដែលចៅក្រមនៅក្នុងសំណុំរឿងនេះបានបដិសេធសំណើសុំសាកសួរផ្ទាល់មាត់លើលោកហ៊ុនម៉ាណែត ចៅក្រមក៏បានយល់ព្រមតាមសំណើររបស់មេធាវី លោកហ៊ុនម៉ាណែតដើម្បីធ្វើការសាកសួរផ្ទាល់មាត់លើលោក Paul Hayes ដែលជាភ្នាក់ងារបញ្ជូនសារអាមេរិកតែម្តង៕
