ខេត្តបន្ទាយមានជ័យ៖បុរសម្នាក់បានស្លាប់ភ្លាមៗនៅនឹងកន្លែង និងម្នាក់ទៀតរងបរួសបាក់ជើង ដោយសារជិះម៉ូតូបុកបង្គោលចំណាំងផ្លាតដោយខ្លួនឯង ដែលហេតុការណ៍កើតឡើងនៅវេលាម៉ោង១៧និង00នាទី ថ្ងៃទី២២ ខែកញ្ញា ឆ្នាំ២០១៦ នៅចំណុចភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
លោកអនុសេនីយ៍ឯក ភឿក ព្រហ្ម មេបញ្ជាការស្ដីទីមូលដ្ឋានកងរាជអាវុធហត្ថក្រុងសិរីសោភ័ណបានអោយដឹងថា ម៉ូតូម៉ាកMSX ពណ៌ក្រហម គ្មានស្លាកលេខ បើកបរដោយឈ្មោះ វ៉ា អ៊ី ភេទប្រុស អាយុ២០ឆ្នាំ រស់នៅភូមិ២ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ (របួសបាក់ជើង) ចំណែកអ្នករួមដំណើរ ឈ្មោះ ឈឹម ចិន ភេទប្រុស អាយុ២២ឆ្នាំ រស់នៅ ភូមិ២ សង្កាត់កំពង់ស្វាយ ក្រុងសិរីសោភ័ណ(ស្លាប់)។
លោកភឿក ព្រហ្ម បានអោយដឹងទៀតថា អ្នករងរបួសត្រូវបានបញ្ជូនទៅមន្ទីរពេទ្យបង្អែកក្រុងសិរីសោភ័ណដើម្បីព្យាបាល រីឯសពត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណីហើយ ចំណែកម៉ូតូយកទៅរក្សាទុកនៅអធិការដ្ឋាននគរបាលក្រុងសិរីសោភ័ណ៕
