ដោយ៖ប៉ែន សុផល
ខេត្តបាត់ដំបង៖កម្លាំងផ្នែកព្រហ្មទណ្ឌនៃអធិការនគរបាលក្រុងបាត់ដំបងបានអោយដឹងថា យោងតាមពាក្យបណ្តឹងរបស់ជនរងគ្រោះនៅវេលាម៉ោង០១ និង០០សៀល ថ្ងៃទី១៥ ខែតុលា ឆ្នាំ២០១៦ មានករណីបាត់រថយន្ត១គ្រឿងនៅក្នុងចំនុចក្រុមទី៤ ភូមិរំចេក៤ សង្កាត់រតនះ ក្រុងបាត់ដំបង ខេត្តបាត់ដំបង ។ ជនរងគ្រោះឈ្មោះម៉ៅ ធីតា ភេទស្រី អាយុ៣៩ឆ្នាំ រស់នៅផ្ទះជួលកន្លែងកើតហេតុខាងលើ ខណះម្ចាស់រវល់មិនបាននៅផ្ទះ ។
ប្រភពនៅកន្លែងកើតហេតុបានបញ្ជាក់ថា រថយន្តដែលបាត់ម៉ាកកាម៉ារីស្វិត ពណ៌ផ្ទៃមេឃ ពាក់ស្លាកលេខកណ្តាល ២A-២៥១៩ ខណះម្ចាស់មិននៅផ្ទះ ជនសង្ស័យដែលជួលផ្ទះសំណាក់នៅជាប់បន្ទប់គ្នា បានយកសោរម៉ូតូមកចាក់ឡានហើយបញ្ឆេះលលេង ឃើញសភាពឱកាសល្អក៍បានប្រមូលខោអាវបើករត់គេចខ្លួនទៅសម្ងំនៅផ្ទះឯស្រុកកំណើតតែម្តង។
សមត្ថកិច្ចក្រុងបានអោយដឹងបន្តរថា ការស្រាវជ្រាវក្រោមកិច្ចសហការជាមួយកម្លាំងមូលដ្ឋានប៉ុស្តិតាក្រាម បានកំណត់មុខសញ្ញាឈានដល់ការឃាត់ខ្លួនជនសង្ស័យបានតែម្តងនៅវេលាម៉ោង០២.05នាទីរសៀល ថ្ងៃទី១៩ ខែតុលា ឆ្នាំ២០១៦ ក្នុងភូមិសាស្ត្រភូមិតាង៉ែន ឃុំតាក្រាម ស្រុកបាណន់ ខេត្តបាត់ដំបង។
ជនសង្ស័យឈ្មោះរ៉េម សាវុធ ហៅផា ភេទប្រុស អាយុ៣១ឆ្នាំមុខរបរមិនច្បាស់លាស់ រស់នៅភូមិ ឃុំ កន្លែងឃាត់ខ្លួនខាងលើ បច្ចុប្បន្នសមត្ថកិច្ចកំពុងកសាងសំណុំរឿងបញ្ជូនទៅការិល័យជំនាញដើម្បីចាត់ការបន្តរតាមនីតិវិធី៕
