រាជធានីភ្នំពេញ៖រថយន្តឡិចស៊ីសGS300 ដែលបើកបរដោយនារីម្នាក់ស្រវឹងស្រាក្នុងលឿនដូចហោះ ក៏រេចង្កូតបុករនាំងដែកពុះចែកផ្លូវបាក់១៥ផ្ទាំង រ៉ឺម៉កម៉ូតូកំពុងចតនៅតាមចិញ្ចើមផ្លូវ២គ្រឿងទៀតខូចទាំងស្រុង ហើយបន្តទៅបុកផ្ទប់នឹងដើមត្របែកព្រៃ ទើបទៅមុខលែងរួច។ ហេតុការណ៍នេះកើតឡើងកាលពីវេលាម៉ោង១០ និង២០នាទីយប់ថ្ងៃទី២៤ ខែតុលា ស្ថិតលើផ្លូវព្រះមុនីវង្ស កែងផ្លូវ២៣២ សង្កាត់បឹងព្រលិត ខណ្ឌ៧មករា ។
តាមប្រភពព័ត៌មាននៅកន្លែងកើតហេតុឱ្យដឹងថា គាត់ឃើញនារីវ័យក្មេងម្នាក់មិនដឹងថា ចេញពីផឹកស៊ីនៅកន្លែងណាទេ បានបើករថយន្តម៉ាកឡិចស៊ីស GS300 ពណ៌ស្ករ ពាក់ស្លាកលេខភ្នំពេញ-2Q 7908 បានធ្វើដំណើរតាមផ្លូវព្រះមុនីវង្ស ក្នុងទិសដៅពីត្បូង ទៅជើង ក្នុងល្បឿនលឿន។ លុះមកដល់ចំណុចកើតហេតុ បានរេចង្កូតទៅបុករនាំងដែកពុះចែកផ្លូវ បណ្ដាលឱ្យវៀចអស់ចំនួន១៥ផ្ទាំងរាយប៉ាយពេញផ្លូវ ហើយរថយន្តបានបួងចង្កូតវិលមួយជុំដូចរង្វង់មូល ហើយរថយន្តបង្ករេចង្កូតទៅខាងឆ្វេងដៃទៅបុក និងរ៉ឺម៉កម៉ូតូ២គ្រឿង ដែលម្ចាស់ចតទុកចោលនៅតាមចិញ្ចើមផ្លូវរង់ចាំដឹកម៉ូយ បណ្ដាលឱ្យរងការខូចខាតខ្ទេចខ្ទី ស្ទើរតែទាំងស្រុង ។ ភ្លាមៗនោះ អ្នកបើកបររថយន្តឃើញស្ថានភាពកំពុងតែរញ៉េរញ៉ៃបានរត់គេចខ្លួនបាត់ស្រមោល។
ក្រោយពេលកើតហេតុ រថយន្តបង្កត្រូវសមត្ថកិច្ចជំនាញមកស្ទូចយកទៅរក្សាទុកនៅការិយាល័យចរាចរណ៍ផ្លូវ ដើម្បីឱ្យម្ចាស់រថ យន្តបង្កចូលខ្លួនមកដោះស្រាយ៕
