ដោយ៖ប៉ែន សុផល
បាត់ដំបង៖យោងតាមរបាយការណ៍ពីលោក ប៉ាង ហៀង អធិការនគរបាលក្រុងបាត់ដំបងបានអោយដឹងថា កម្លាំងជំនាញនៃអធិការដ្ឋាននគរបាលក្រុងបាត់ដំបងបានឃាត់ខ្លួនជនសង្ស័យម្នាក់នៅវេលាម៉ោង១ និង០០នាទី រំលងអធ្រាត្រឈានចូលថ្ងៃទី២៥ ខែតុលា ឆ្នាំ២០១៦ នៅចំណុចក្រុមទី១៦ភូមិអញ្ចាញ សង្កាត់អូរចារ ក្រុងបាត់ដំបង ពាក់ព័ន្ធទៅនឹងករណីហិង្សាដោយចេតនាមានស្ថានទម្លន់ទោស។
លោកបន្តថា ករណីខាងលើ បង្កដោយជនសង្ស័យឈ្មោះ ម៉ុក កោសិល ភេទប្រុស អាយុ៤៤ឆ្នាំ រស់នៅក្រុមទី១៦ ភូមិអញ្ចាញ សង្កាត់អូរចារ ក្រុងបាត់ដំបង។ ចំណែកជនរងគ្រោះឈ្មោះ ម៉ុក សុផល្លា ភេទប្រុស អាយុ៣២ឆ្នាំរស់នៅឃុំ/សង្កាត់ជាមួយគ្នា។
ប្រភពនៅកន្លែងកើតហេតុបានប្រាប់ថា នៅមុនពេលកើតហេតុជនរងគ្រោះខាងលើបានទៅផឹកស៊ីស្រវឹង ហើយត្រឡប់ទៅផ្ទះវិញក្រោយមកមានការឈ្លោះប្រកែកគ្នាជាមួយប្រពន្ធ ភ្លាមៗនោះក៏ស្រាប់តែជនសង្ស័យខាងលើដែលត្រូវពូបានកាន់កូនកាំបិតសចុងស្រួច(កាំបិតចិតបន្លែ) សំដៅមកចាក់ជនរងគ្រោះមួយកាំបិតចំពោះបណ្តាលអោយរងរបួសធ្ងន់តែម្តងត្រូវបានក្រុមគ្រួសារបញ្ជូនសង្គ្រោះនៅមន្ទីរពេទ្យ។
បច្ចុប្បន្នជនសង្ស័យខាងលើត្រូវបានសមត្ថកិច្ចកសាងសំណុំរឿងបញ្ជូនទៅតុលាការនៅរសៀលថ្ងៃទី២៥ ខែតុលា ឆ្នាំ២០១៦នេះដើម្បីចាត់ការបន្តទៅតាមផ្លូវច្បាប់៕
