រាជធានីភ្នំពេញ៖អ្នកនាំពាក្យក្រសួងយុត្តិធម៌លោក គឹម សន្តិភាព បានអោយដឹងនៅព្រឹកថ្ងៃទី២៦ តុលា ២០១៦នេះថា ទណ្ឌិតប្រមាណជាង៥០០នាក់មកពីពន្ធនាគាររាជធានីខេត្តចំនួន១៩ និងមណ្ឌលអប់រំកែប្រែចំនួន៤ នឹងត្រូវបន្ថូរបន្ថយទោស និងលើកលែងទោសក្នុងឱកាសបុណ្យអុំទូកខាងមុខនេះ។
អ្នកនាំពាក្យរូបនេះបញ្ជាក់ថា នៅរសៀលថ្ងៃនេះឯកឧត្តមរដ្ឋមន្ត្រីក្រសួងយុត្តិធម៌ អង្គ វង្សវឌ្ឍនា និងជាប្រធានគណៈកម្មាធិការជាតិពិនិត្យបញ្ជីទណ្ឌិត ស្នើសុំបន្ធូរបន្ថយទោស និងលើកលែងទោស នឹងដឹកនាំកិច្ចប្រជុំគណៈកម្មការជាតិ ពិនិត្យលើសំណើររបស់គណៈកម្មការក្រសួងមហាផ្ទៃ និងគណៈកម្មការថ្នាក់រាជធានីខេត្ត ដែលបានស្នើសុំការអនុគ្រោះទោស ដល់ទណ្ឌិតប្រមាណជាង៥០០នាក់ ពីពន្ធនាគាររាជធានីខេត្តចំនួន១៩ និងមណ្ឌលអប់រំកែប្រែចំនួន៤។
គួរបញ្ជាក់ថា កម្ពុជានឹងប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ពីថ្ងៃទី១៣-១៤ និងថ្ងៃទី១៥ វិច្ឆិកា ឆ្នាំ២០១៦ខាងមុខនេះ៕
