អ៊ីរ៉ាក់៖តាមរយៈខ្សែអាត់ថតសំឡេងមេដឹកនាំកំពូលក្រុម ISIS អាប៊ូបាកើ អាល់បាដាឌី លើកឡើងថា សង្គ្រាម និងការប្រយុទ្ធនាពេលបច្ចុប្បន្ន នឹងកាន់តែបង្កើនជំនឿក្នុងការតស៊ូប្រយុទ្ធ ដើម្បីជ័យជម្នះ ហើយក្រុមអ្នកប្រយុទ្ធ និងអត្តឃាតជនទាំងអស់ត្រូវតែតស៊ូរហូត ដល់ទីបំផុតក្នុងសង្គ្រាម នៃទីក្រុង Mosul ក៏ដូចជាការបំផ្លាញ និងប្រែក្លាយទីក្រុងនៃសត្រូវរបស់ព្រះ (ប្រទេសលោកខាងលិច) ឱ្យក្លាយទៅជាឈាមដាបដូចទន្លេ។ នេះបើយោងតាមទីភ្នាក់ងារព័ត៌មាន Reuters ផ្សាយនៅព្រឹកថ្ងៃព្រហស្បតិ៍ ទី០៣ ខែវិច្ឆិកា ឆ្នាំ២០១៦នេះ។
គួរបញ្ជាក់ថានេះគឺជាលើកដំបូងបំផុតហើយ ដែលមេដឹកនាំកំពូលក្រុមISIS អាប៊ូបើកើ អាល់បាដាឌី ផ្ញើសារទៅកាន់អ្នកគាំទ្ររបស់ខ្លួនបន្ទាប់ពីត្រូវបានគេអះអាងថា លោកបានស្លាប់ជាច្រើនដងមកហើយ ខណៈកងកម្លាំងអ៊ីរ៉ាក់គាំទ្រដោយសហរដ្ឋអាមេរិក កំពុងវាយលុកចូលទីក្រុង Mosul ដែលបានធ្លាក់ ទៅក្រោមការគ្រប់គ្រងរបស់ក្រុម ISIS ចាប់តាំងពីឆ្នាំ២០១៤៕
