រាជធានីភ្នំពេញ៖កម្មករផ្សារដែកម្នាក់ ត្រូវបានគេប្រទះឃើញដេកស្លាប់ ថ្កាប់មុខ នៅក្នុងតូបលក់ដូរ កាលពីវេលាម៉ោង៦ និង៣០នាទីព្រឹកថ្ងៃទី០៧ ខែវិច្ឆិកា ឆ្នាំ២០១៦នេះ ស្ថិតនៅត្រង់ចំណុចតូបផ្សារតូចផ្លាហ្សា ក្នុងសង្កាត់ស្រះចក ខណ្ឌដូនពេញ សង្ស័យឆក់ខ្សែភ្លើង។
សមត្ថកិច្ចបានឲ្យដឹងថា ជនរងគ្រោះ មាន ឈ្មោះ ពីន គា ភេទប្រុស អាយុ១៩ឆ្នាំ មុខរបរ កម្មករជាងដែក ស្នាក់នៅទីតាំងកើតហេតុខាងលើ និងមានស្រុកកំណើតនៅភូមិច្រាបឃុំ២ធ្នូ ស្រុកស្នួល ខេត្តក្រចេះ ។
ប្រភពពីមិត្តរួមការងារឈ្មោះ វីរៈ ភេទប្រុស អាយុ២១ឆ្នាំ ជនជាតិខ្មែរ មុខរបរកម្មករជាងផ្សារដែក ដែលមានស្រុកកំណើតនៅភូមិអូររុន ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម បានប្រាប់សមត្ថកិច្ចឲ្យដឹងថានៅថ្ងៃធម្មតារូបគេតែងតែ ចេញមកបើកទ្វារ តូបពីព្រលឹមនាំជនរងគ្រោះធ្វើការងារ។ ព្រោះគេនិងជនរងគ្រោះស្នាក់នៅកន្លែងផ្សេងគ្នា ប៉ុន្តែនៅថ្ងៃកើតហេតុនៅខណៈពេលរូបគេមកបើកទ្វារតូបដើម្បីធ្វើការងារដូចថ្ងៃធម្មតាស្រាប់តែបើកទ្វារតូបក៏ប្រទះ ឃើញជនរងគ្រោះដេកផ្កាប់មុខនៅក្រោមឡៅតឿភ្លាមនោះដែររូបគេស្មានតែជនរងគ្រោះខ្យល់គរដួលក៏ស្ទុះទៅលើកបំរុងដឹកយកទៅសង្គ្រោះដែរប៉ុន្តែនៅខណះពេលរូបគេលើកជនរងគ្រោះផ្ងារឡើង ទើបដឹងថា ជនរងគ្រោះបានស្លាប់បាត់ទៅហើយរួចគេទូរសព្ទ័ប្រាប់ថៅកែថាឈ្មោះពីនគាដេកស្លាប់នៅក្នុងតូបដោយមិនដឹងមូលហេតុ។
ចំពោះ ថៅកែរបស់ជនរងគ្រោះឈ្មោះ គឹម សុជាតិ ភេទប្រុស អាយុ៣៩ឆ្នាំ(មុខរបរជាងដែក)ក្រោយពីទទួលដំណឹងថា មានកម្មកររបស់ខ្លួនដេកស្លាប់នៅក្នុងតូបរបស់ខ្លួនភ្លាមនោះគេក៍៏មកដល់កន្លែងកើតហេតុហើយទូរស័ព្ទប្រាប់សមត្ថកិច្ចប៉ុស្តិ៍ស្រះចកតែម្តង។
ពាក់ព័ន្ធនឹងករណីកម្មករជាងដែកម្នាក់ដេកស្លាប់ នៅក្នុងតូបផ្សារដោយគ្មានមូលហេតុ នោះ សមត្ថកិច្ចជំនាញបានបង្កើតគណៈកម្មការចម្រុះ ចុះធ្វើកោសល្យវិច័យរួចកម្លាំងសមត្ថកិច្ច ជំនាញក៍បានសន្និដ្ឋាន ថា ជនរងគ្រោះស្លាប់ដោយចរន្តអគ្គិសនី ឆក់នៅលើឡៅតឿធ្លាក់មកក្រោមបណ្តាលឲ្យស្លាប់តែម្តងហើយនៅលើខ្លួនជនរងគ្រោះមានស្នាមរបួស។
ក្រោយពីធ្វើកោសល្យវិច្ច័យរួចសពត្រូវបាន សមត្ថកិច្ចប្រគល់ឲ្យក្រុមគ្រួសារដឹក យកទៅធ្វើបុណ្យ នៅឯ ស្រុកកំណើតស្រុកស្ទឹងត្រង់ខេត្តកំពង់ចាម៕
